ایلرم حمد و ثنای کردگار
اولموشام حق درگهینده استوار
وار امیدیم خالق ارض و سما
کسمسون لطفون نقدری عمر وار
چوخ گناهه وورموشام هر چند، ال
ایتمیشم جرم و خطای بی‌شمار
بو قدر عصیانیله من آگهم
ناره روز حشریده اولّام دچار
اول چتین ساعتده بس چاره ندور
کیم‌گلوب الدن او ساعتده دوتار
آلمیشام پیر خرددن من خبر
تا منه سرّین - او - ایتسون آشکار
عرض ایدوب گون تک عیاندور مسئله
ایستوسن غمدن تاپا قلبون قرار
چکمه ال دامان آل اللّهیدن
هر چتین غمده سنه اولسونلا - یار
دوتموشام آل علی دامانینی
تا اولار اولسون منه هر یرده یار
دل آچان گوندن حسینون آدینی
اولموش همواره منه ورد و شعار
اگنیمه گیدیم حسینون قاره‌سین
بو لباسه ایلرم من افتخار
آدیمی قویدوم حسینچی دهریده
کیم حسینچی اولسا شخصیّت تاپار
آتدیم عشقینده- هامی عالملری
ال گتوردوم هر ندن بی‌اختیار
بلمورم گلشن ندور، باغ هاردادور
سن منه هم باغسن هم لاله‌زار
کیم‌گوله دل باغلاسا دیوانه‌دی
هر نجه گل اولسا، آز عمری اولار
من سنون تک بیر گوله دل باغلادیم
چونکه عطرین هامی گول سندن آلار
کیمسه گولدن بلبلی تک گورمیوب
بیر نوالی بلبلم زار و نزار
آدیوین هر گون دولانام باشینه
بو طبیعیدور - گوله بلبل قونار
جنّتی زاهد - ندن تعریف ایدور
بلمورم جنتده من آیا نه وار
جنّتیمدور مجلس ماتملرین
قوی بهشتی زاهد، ایتسون اختیار
کیم خلوصیله گله بزم غمه
آند اولا زهرایه جنّتدن دویار
کوثریمدی آند اولا - اوز جانیوه
هر بو گوز یاش کی آقا گوزدن آخار
کوی وصلیمدور - دیار کربلا
کربلادن کعبه تاپدی اعتبار
کعبه الله بیتیدی - وار حرمتی
کربلا تک تربتینده یوخ چیخار
شرعیده توپراق یماق جایز دگول
لیک خاک کربلانین فرقی وار
کیم مریض اولسا - او توپراقدان یِسه
درد - بی‌درمانینه درمان آلار
کربلا یعنی - دیار آرزو
کربلا یعنی شرف یعنی وقار
کربلا یعنی حسینون مدفنی
کربلا یعنی او ششگوشه مزار
کربلا یعنی چوخور یر - قتلگاه
کربلا یعنی عشّاقه لاله‌زار
کربلا یعنی ستم - درد و الم
ظلم اعدائیله قلب داغدار
کربلا یعنی سنان - تیر و کمان
خنحر و شمشیر و نیزه - نیزه‌دار
کربلا یعنی صفوف اشقیا
قتلگهده تیرباران - سنگسار
کربلا یعنی اورکده اوچ پر اوخ
ای عجب دنیا اولیدون تار و مار
کربلا یعنی عطش یعنی فرات
کربلا یعنی حسین دلفکار
کربلا یعنی جفای شمر دون
بیر الینده تیغ تیز و آبدار
کربلا یعنی نواسی زینبون
گوردی شمر ایستور ایده دنیانی تار
قصد ایدوب مظلومه تا نصرت ایده
تلّیدن میدانه قاچدی بیقرار
سالدی اوّل سینه‌سی اوستن یره
بیر شجاعت گوستروب اول باوقار
سسلدی ال چک حیا - ایله اوتان
گورموسن جسمینده بی حدّ زخم وار
چیخموسان هیچ بلموسن آیا هارا
منبر اوسته کیم بیله ظالم چیخار
گوزلرون از بس دوتوب قان گورموسن
چشمه چشمه یاره‌سیندن قان آخار
چکمه خنجر قویما قارداشسیز منی
قیزلاری ایندی قالوبدور انتظار
ایندی کی ئولدورماقا وار نیّتون
بیر زمان گل اول بو مقتلدن کنار
جان ویرنده گوزلرینی باغلیوم
باجی قارداش گوزلرینی باغلیار
قوی ویروم قارداشیمه بیر جرعه سو
گورموسن سوز عطشدن اودلانار
قتلگاهه حضرت زهرا گلوب
هر آنا اوغلی ئولنده باش آچار
قوی آنام آغوشه آلسون پیکرین
من دولانیم باشینه پروانه وار
گوردی شمر ایله عناد اوسته دوروب
ری - هواسی ایلیوب مست و خمار
بلمورم یا رب ندن اذن اولمادی
تا خراب اولسون بو چرخ کجمدار
جراتیله دوتدی شمرین خنجرین
گورنه ظلم ایتدی او شوم نابکار
بو سوزه عذر ایستورم یابن الحسن
عفو قیل ای حجت پروردگار
ال کسیلدی قان توکولدی مقتله
عمه‌وین بو حالینه - عالم یانار
زینبون ناله سسی گتدی حالا
گوزلرین آچدی او میر تاجدار
زینبی گوردی او حالتده حسین
گوزلریندن یاش الیندن قان آخار
عرض ایدوب زینب قییت سن خیمیه
اول بلالی قیزلاریما غمگسار
ایلدی امر امامه امتثال
خیمیه مقتلدن اولدی رهسپار
یول گیدور، آغلور، دورور، هر دم دونوب
حسرتیله مقتله - ایلور نظار
شمر الینده قویدی یالقیز قارداشین
نیلسون یوخ چاره‌سی ای کردگار
بیر زمان دگدی عوالم - بیر بیره
قتلگاهی یکسره دوتدی غبار
گوردی لشگر چوخ هیاهو ایلوری
اضطرابیله باخوب گورسون نه وار
نیزه‌دن گوردی گلور صوت اذان
بولدی ظلمون ایتدی شمر کین شعار
تا وورولدی نیزیه - راس امام
ظلمودن فکر ایتمه لشگر دویدولار
عصره جک قان توکدولر ئولدوردول
بیر‌به‌بیر قتله یتوب خرد و کبار
زینبه بیر آیری محشر باشلانوب
حمله گتدی خیمیه - سویقونچولار
فکر غارت باشدا سایسیز لشگرین
خیمه‌گاهه اود ووروب یاندوردولار
قوش کیمی قیزلار داغیلدی چوللره
الده قمچی آردیجا بش اون سوار
آت قاباقینجا سالوب خردا قیزی
قوودولار - هی ووردولار - تا یوردولار
هر بالا قیز که یورولدی قاچمادی
قالدی معجر - نه قولاقدا گوشوار
سسلدی زینب هرایه گل حسین
قیزلاریوی قارداش اعدا سویدولار
وار یری ایتسون حسین بیله خطاب
زینب ای زهرا آنامه - یادگار
آغلاما صبر ایت باجی هر محنته
وقریوی سیندیرما ای کان وقار
بیرده گویلون ایسته قارداشیوی
باخ جدالر باشینه ای - دلفکار
مطلبون هاردان چکیلدی گور هارا
"اکرمی" یازما داخی بسدور قوتار
محشره سعی ایله اخذ توشه قیل
چون الون بوشدور اولارسان شرمسار
فاطمه بیر یول نظر قیلسا سنه
هر ایکی دنیاده غمدن قورتارار
- سه شنبه
- 31
- فروردین
- 1400
- ساعت
- 18:45
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه