قییتدی کرب‌و‌بلایه قطار آل‌الله
فضاسینی او چولون دوتدی ناله‌ی جانکاه
مخدّرات بلا دیده ناقه اوستوندن
توکولدولر یره گوزده سرشگ قلبیده - آه
یانقلی زمزمه‌لر باشلیوبدی اهل حرم
سپهر دوده‌ی آهیله اولدی رنگی - سیاه
حسینون عطرینی تا آلدی زینب نالان
خدا بلور که نه حاله قالوب او علیا جاه
اجازه ویردی خانم شدّتیله گوز یاشینا
گورنده قارداشینون توزلی مرقدین ناگاه
سوروندی یا یریدی قبرینون کنارینده
نه سرّیدور که ایدوب عقل و فهمیمی گمراه
بو قدر وار یتشوب قویدی قبری اوسته یوزون
دیدی اویان گوز آچ ای زینبه امید و پناه
ایاقه دور باجیوی پیشواز ایله قارداش
ایدوم سنی باشیمون ابتلاسینه آگاه
او ساعتی که حسین مندن آیریلوب گیتدون
گونوم دولاندی منیم روزگاریم اولدی سیاه
ایلیکه امر شهادتدن اولدولار فارغ
توکولدولر خیم آل مصطفایه سپاه
وورولدی اود، اولان اولدی یانان یانوب قارداش
سویولدی اهل حرم، گیتدی غارته خرگاه
حیاسیز امّته بو خردا قیزلار اولدی اسیر
دولاندی چوللری شمر و سنانیله - همراه
نجه دیوم سنه اوضاع کوفه و شامی
نه چکدی قیزلار او یرده فقط بلور الله
گتوردولر بیزی قولباغلی مجلس عامّه
نه ظلم ایدوبدور او مجلسده اول عدوّ الله
یارالی باشیوی طشت طلایه قویموشدی
ووروردی لبلریوه خیزران عبیدالله
یتونجه شامه ولی جان یتیشدی لبلریمه
وراردی طعنه بیزه اهل شام شام و پگاه
خرابه منزلیم اولدی حسین گوزوندن ایراق
واریدی سقفی نه فرشی، نه بستر دلخواه
رقیّه‌نی خبر آلما خجالتم قارداش
خرابه‌ده اوتوراردی همیشه چشم به راه
دیردی عمه منیم بس بابام نیه گلمور
ندندی یاده بیزی سالموردی او شاهنشاه
مگر آتا سفر ایتسه قیزین ایدلّه اسیر
ویره لّه گوشه ویرانه‌ده بو نوعی پناه
آمان او بیر گیجه‌دن گوئیا قیامتیدی
باشون خرابیه گلدی اوجالدی ناله و آه
یارالی باشیوی آلدی رقیّه آغوشه
دیدی وصاله بی‌بی چاتمیشام بحمدالله
دیدی بابا دی گوروم کیم منی یتیم ایتدی
سنی بو حاله سالوب هانسی مرتد و گمراه
سنی یارالی گوروب گیتدی طاقت و صبریم
سنون غمونده اسور گور نجه اورک چون کاه
یارالی لبلریوی ئوپدی گوزلری آخدی
ویرنده جان ولی حسرتله ایلوردی نگاه
او گوهری دل ویرانسراده گیزلتدیم
دیدیم که شمرون اوزون قاره ایلسون الله
مزاریوی آنامین اوغلی ئولمدیم گوردوم
غریبه حالیمه شامل اولوندی لطف الاه
تیکوبدی گوز آقاجان "اکرمی" عنایتیوه
مگر گدایه نظر ایلمز سنون کیمی شاه
منه قاپون ایکی دنیاده باب رحمتدور
اودور تانیمادیم عمرومده آیری بیر درگاه
- چهارشنبه
- 1
- اردیبهشت
- 1400
- ساعت
- 12:45
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه