قدم قویاندا فراته او تشنه‌لب سقّا
سویون نسیمین آلوب گیتدی قلبیدن یارا
گرکدی تیر محن قلب شیعه‌دن گیچسون
سودان او ساقی لب‌تشنه ایستدی ایچسون
سودا مجسّم اولوب قیزلارین سولان رنگی
نه حاله قالدی حسینون وفالی سرهنگی
بیر آه چکدی دل عالمی کباب ایلدی
او باوفا بیله اوز نفسینی خطاب ایلدی
که ایستوسن منی ای نفس شرمسار ایده‌سن
منی سوسوز بالالارین یانیندا خوار ایده‌سن
محال امریدی عبّاس بو سودان ایچمز
حسینیدن بوگون اوز نفسینی قاباق سیچمز
حسینسیز عالم ابوالفضله تیره شام اولسون
اگر ایچم‌بو سویی - سو منه حرام اولسون
بو سوزلری دیدی گوز یاشی توکدی مثل سحاب
دوباره‌دن او سویا ایلدی بو نوعی خطاب
ندندی سیل کیمی چوللره فرات - آخوسان
بنات حضرت زهرانی یاندیروب یاخوسان
روادی گور بالالار گول کیمی سولا ای سو
سرشگ حسرتیله گوزلری دولا - ای سو
روادی گور نچه گون نچه گوندوز آل‌الله
قالا سوسوز سو کنارینده قلبیدن چکه آه
نجه ایچیم سنی ای سو - سو جامی اللرده
گزولّه خیمده قیزلار - سو آدی دللرده
نجه ایچیم سنی ای سو یانور علی‌اصغر
ربابین عرشه اوغول وای صداسی اوج ایلر
ایدوبدی بیر سویا بیر سمتِ خیمه‌گاهه نظر
سویی توکوب یره ایتدی عذارین اشگیله تر
غمیله قلبِ بو عالم‌سرایه اود ووردی
گُتوردی اول قوریان مشگینه سو دولدوردی
او باوفادن او دم گویلره فغان چیخدی
اوزی عطش، آدی سقّا، سوسوز سودان چیخدی
بو فکریلن که سویی خیمه‌گاهه تز - یتوره
علی‌اصغرینون گویلونی - اله گتوره
سالوبدی چیگنینه مشگین او ساقی عطشان
مسیری اولدی اونون تنگ راه نخلستان
دیلینده زمزمه‌ی - لا اله الّا الله
و محمد رسولُه - علی ولی الله
دیردی ایندی رقیّم توکور یوزه قانیاش
بو مشگی تز یتورم خیمه گاهه من ای‌کاش
اوزون بو سرّی بلورسن ایا امام زمان
نه ظلم ایلدیلر اشقیای بی‌ایمان
یاغیش تک اوستونه یاغدیردی اوخلاری اعدا
نه حالته قالوب اول تشنه‌لب اولان سقّا
چکردی جان کیمی اول مشگ آبی سینه سینه
باخ اهل شامین او صحراده بغض و کینه‌سینه
گینه اوخیدی که دورت سمتیدن آتوردی مدام
آرایه آلدیلار اول شیری اهل کوفه و شام
او اوخلارین بیری قان ایتدی گوزدکی اشگین
کمانیدن قوتولوب پارچالادی سو مشگین
بهار فصلی خزان ووردی باغ آمالین
کسوبدی رشته‌ی صبرین پوزوبدی احوالین
اوزون باغیشلا منی یا شریکةَ القرآن
نقدر سوزلری من یازمادیم قالوبدی نهان
یازانمورام نه جسارتله ساغ قولی دوشدی
یازام الیمده توان یوخ نجه صولی دوشدی
بو قدر وار دیرم یاره‌لی - او جان خسته
عقابیدن یره قولسوز دوشوب یوزی اوسته
دولاندیروب یوزونی خیمه‌گاهه زحمتیله
چاغیردی قارداشین امدادینه نه حالتیله
دیدی قزل قانا نعشیم بویاندی گل قارداش
ییخیلمیشام یره آتدان آماندی گل قارداش
اوزون گل آل منی قاتللرین الیندن حسین
که عرشه شعله‌ی آهیم دایاندی گل قارداش
ولی گلنده بو حالی رقیّه‌دن گیزلت
جفا و ظلمیله حالیم یاماندی گل قارداش
علیّ اصغره دی گوزلمه عمون یولونی
خجالتم بالالاردان اماندی گل قارداش
بو گوز بو قوللار اولا سن گلن یولا قربان
گوزوم یاشی غمِ هجرینده قاندی گل قارداش
باشیمون اوسته آنان فاطمه گلوب تز گل
عذاره گوز یاشی گوزدن رواندی گل قارداش
دیدیم منی نه گوزل وقته یادیوه سالدون
دیدی اوغول سنه نه گلدی بو حاله قالدون
دیدیم ننه منی شرمنده ایلدی عدوان
دیدی قوجاقیمه گل فاطمه سنه قربان
دیدیم ننه اورگون قویما دردیله دولسون
بویوردی سنسیز حسینون حالینا وای اولسون
دیدیم که "اکرمیه" ایت توجّه عقباده
دیدی ئولنده حسینیم سالار اونی یاده
- چهارشنبه
- 1
- اردیبهشت
- 1400
- ساعت
- 13:8
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه