ای رضا ای حجّت یزدان سلام اولسون سنه
وی غریب کشور ایران سلام اولسون سنه
فرش ایچون جنّت یارالدوب قبریوی عرش آفرین
وار یری اولسون غلام درگهون روح‌الامین
غبطه ایلر بو مقاماته آقا - خلد برین
سسلنر قدّوسیان هر آن سلام اولسون سنه
سن او شه سن جمله شاهلار تحت فرمانونده‌دی
ریزه‌خواروندور آقا - حاتم سر خوانونده‌دی
نه تک حاتم بلکه چشم عالم احسانونده‌دی
ای اولان سر منبع احسان سلام اولسون سنه
بارگاهون شانینه جنّات چاتماز بی‌دلیل
تشنه‌ی لعل لبوندور کوثریله - سلسبیل
قبریوه شیعه قویار یوز دلده ذکر الدّخیل
جان شیعه قبریوه قربان سلام اولسون سنه
قبریوه ایله عنایت زار و گریان گلمیشم
چوخ گنهکارم پشیمانم - پریشان گلمیشم
دردیمه درمان آلام ای جان جانان گلمیشم
دردیمه ایله اوزون درمان سلام اولسون سنه
جلوه‌گر اولدی گوزیمده وادی کرب‌و‌بلا
گوزلریمدن خون دل جاری اولوندی برملا
سسلدی زینب ایاقه قبریدن دور بیر اخا
اربعیندور گلمیشم مهمان سلام اولسون سنه
اینجیدیم سندن صورا دنیاده هر آن آغلادیم
مونسیم یوللاردا اولدی آه و افغان آغلادیم
یادیمه دوشدی سوسوز جان ویرماقین قان آغلادیم
قامتیم غمدن اولوب چوگان سلام اولسون سنه
باشیمه شاماتیده یاغدی بلا و غم کولی
سولدی ظلمیله حسین جان عمریمون سولماز گولی
قالدی ویرانه سراده - آل عصمت بلبلی
خانه‌ی صبریم اولوب ویران سلام اولسون سنه
تا گوروب باشون طبقده اولدی گویا حشر عیان
سیلدی قانی لبلریندن ایلدی آه و فغان
سن اوزون گوردون نجه ویردی قیزین حسرتله جان
غصّه‌دن قلبیم اولوبدور قان سلام اولسون سنه
یا حسین ای زاده‌ی زهرا - گل اهل کسا
"اکرمی" اوز نوکروندی نا‌امید ایتمه آقا
قسمتیمده اولسا قبرون اوسته یوز قویسام شها
سسلرم ای شاه مظلومان سلام اولسون سنه
- پنج شنبه
- 2
- اردیبهشت
- 1400
- ساعت
- 13:19
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه