سلام اولا سنه ای کربلا غریبی حسین
سلام اولا سنه ای مرتضایه نور دو عین
سلام اولا سنه ای زینبی گوزوندن آتان
یارالی بی‌کفن اوخ، نیزه ،خنجر، آلتدا یاتان
سلام اولا سنه ای باشی ذبح اولان دالیدان
کنار نهریده ظلمیله جان ویرن عطشان
سلام اولا سنه ای پیکری قالان عریان
جفای خاریله گول سینه‌سی اولان خندان
سلام اولا سنه ای اللره دوشن باشی
اوغول غمینده دونن قانه گوزده گوزیاشی
سلام اولا سنه ای سرو قامتی بوکولن
اوره گی ظلمیله اوچ شعبه تیریله سوکولن
سلام اولا سنه ای نوگل رسول الله
آخان چوله سو کیمی قانی فی سبیل الله
سلام اولا سنه ای گلشنی اولان پامال
مسافرم گیدورم دور منی اوزون یولا سال
دیار شامه بوگون باغریقان گیدور زینب
نه چاره سندن حسین ناگران گیدور زینب
نجه بو سینمی من مایل ایلیوم صبره
یارالی پیکریوی کیم قویار حسین قبره
اسیر ایدوب منی سنسیز بو لشگر عدوان
اویان باخ حالیمه زینب سنه اولا قربان
نه بی‌خبر بالالاردان بیله ایدوبسن خواب
سنی بو نوعی گوروب من نجه گتورّم تاب
بو رسمیدور که هزاره چمندن آیریلماز
گر اختیار اولا زینبده سندن آیریلماز
گوروم جهاندا حسین شمری یتمسون کامه
چکور قطاریمی قولباغلی کوفه و شامه
نجه من آغلامیوم توکمیوم یوزه قانیاش
نه وار الون نه باشون وای منه حسین قارداش
قالوبدی گون قباقیندا یارالی گول بدنون
نولوبدی بس باجون ئولسون او کهنه پیرهنون
چالندی طبل رحیل - من خداحافظ
بو کربلا آنام اوغلی بو سن خداحافظ
- پنج شنبه
- 2
- اردیبهشت
- 1400
- ساعت
- 13:38
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه