باشه آز قالور یتیشسون عالم وصال عم‌اوغلی
ئولورم گوزومی باغلا قیل منی حلال عم‌اوغلی
هر مسافرین دالیجا خوش اولار اوخونسا قرآن
مقصده یتر سلامت ای عزیز حیّ و سبحان
ایله یاسینی تلاوت - او گوزل سسیوه قربان
گیتملی مسافرم من داخی یولا سال عم‌اوغلی
تنگ بو قفسدن ایستور مرغ روحیم اولسون آزاد
باشیمی محبتیله آل دیز اوسته ایتمه فریاد
قوی الیوی سینم اوسته غملی گویلومی سن ایت شاد
منه باخما حسرتیله توکمه اشگ آل عم‌اوغلی
بلوسن مریض عشقم ای غم و محن نصیبی
دردیمون دواسی سنسن گل طبیبیلر طبیبی
آخرین نفس قرین لطف قیل بو بی‌شکیبی
حقّیوی بتوله ایله بو زمان حلال عم‌اوغلی
یتشوبدی جان دوداقه داخی حال رقّتیم وار
سنه غملی بو چاقیمدا نچّه سوز وصیتیم وار
گل دیوم عم‌اوغلی بیربیر تا نقدری فرصتیم وار
ایلیوم اجل یتونجه سنه کشف حال عم‌اوغلی
بیریسی بودور من ئولسم غالب اول سپاه صبره
قیل تحمل هر بلا و محنت و ملال و جبره
منه غسل ویر کفن قیل قوی اوزون گجیله قبره
اولماسین بو سرّه آگه فرقه‌ی ضلال عم‌اوغلی
سنه بیرده بیر سوزوم وار سنی تاری قیل رعایت
کوینگیمی غسل ایدنده سویما ای شه ولایت
ظلم ثانیدن گوررسن وار سینمده بیر جراحت
توکه سن مزاریم اوسته یوزه اشگ آل عم‌اوغلی
ببرده ایلورم عم‌اوغلی بالالاریمی سفارش
ایله اهتمام ایتسون اورگین غمیله سازش
بالالاریما بو ایوده ایله دائماً - نوازش
بیر دقیقه چکمسونلر محنت و ملال عم‌اوغلی
گل بو خسته پیکریمدن رخت وصلتی سویونجا
ریشه‌ی گلِ حیاتی - تیشه‌ی اجل اویونجا
ویر قوجاقیمه حسینی یوز گوزون ئوپوم دویونجا
ایلیوم وداع بالامی وقت ارتحال عم‌اوغلی
آگهم بو سرّه بیر گون کوفیان نامسلمان
دشت کربلاده ایلر قانینه حسینی غلطان
قتلگهده شمر کافر باشینی کسر لب‌عطشان
غارت ایلیر خیامین فرقه‌ی قتال عم‌اوغلی
گورّم "اکرمی" عم‌اوغلی گوزی یاشلی دلده حسرت
اورگینده نه زماندور واردی تکجه بیر بو نیّت
هامی آلتی گوشه قبری گیدوب ایلدی زیارت
اونادا - عنایت ایله ای نکوخصال عم‌اوغلی
- پنج شنبه
- 2
- اردیبهشت
- 1400
- ساعت
- 14:17
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه