آل علیدن دختر طاهانی ساخلا ای بقیع
قامت سروی کمان زهرانی ساخلا ای بقیع
نصف شب بو جسمی که من ایندی تاپشوردوم سنه
چوخ اذیتلر چکوبدور توش اولوبدور دشمنه
خواهشیم وار ساخلا راحت سنده قوی منّت منه
مندن آل انسیّه حورانی ساخلا ای بقیع
ای بقیع زهرا چکوب بو دوقّوز ایلده چوخلی غم
ساچلارین آخر آغارتدی غصّه و بار الم
اولدی اون سگّز یاشیندا قامت رعناسی خم
درد و غمدن قامت چوگانی ساخلا ای بقیع
غصّدن دوقّوز ایل اولدی صورتی اشگیله تر
قالدی حسرت خوش گونه قان آغلادی شام و سحر
سینه‌سین دَلدی یاناندا درگهی مسمار در
دیده گریان سینه‌ی سوزانی - ساخلا ای بقیع
درد و غمدن دوقّوز ایلده شامه دوندی گوندوزی
حیف اولا چوخ تز چیخوب تز باتدی زهرا اولدوزی
گور نجه نیلی اولوبدور ضرب سیلیدن یوزی
بوسه‌گاه حضرت طاهانی ساخلا ای بقیع
غالب بی روحیمه زهرا منیم جانانیدی
گلشن ختم رسالتده گل ریحانیدی
دردی دریالر کیمی بی حدّ و بی پایانیدی
مبتلای درد بی پایانی ساخلا ای بقیع
ای بقیع زهرا حسین و زینبی گوزدن آتوب
دوقّوز ایل خونِ دله گوز یاشینی دائم قاتوب
بلمورم ایندی نجه بیر لحظه زینبسیز یاتوب
مادر محبوبه‌ی طفلانی - ساخلا ای بقیع
وار یری قان آغلاسان احوالیمه سن ای تراب
گور بو آز مدّتده نه حاله قالوبدور بوتراب
کاش نورین کسب ایدیدی گویده ماهین بیر سحاب
گورمییدیم سینه‌ی القانی - ساخلا ای بقیع
بو محنده وار یری شام و سحر افغان ایدم
هر نقدری عمروم اولسا باغریمی القان ایدم
چون وصیت ایلمیشدی قبرینی پنهان ایدم
سنده گیزلت بو دُر والانی ساخلا ای بقیع
مدفن زهرا اولوبسان گور نه عزّتدور سنه
اینجیسون اولما رضا گرچه اذیّتدور سنه
بو یارالی قوش بوگون مندن امانتدور سنه
منکسر آئینه‌ی ایمانی ساخلا ای بقیع
ایندی زهراسیز نجه بیرده گیدوم اول منزله
من دعا ایلوم، سن آمین دی اجل پیکی گله
تا آلا بو خسته جانی - مرتضی بوردا ئوله
نیلورم من جانیمی ، جانانی ساخلا ای بقیع
ای بقیع ای مدفن صدّیقه کبرای زار
"اکرمینون" سینه‌سینده بیر غم عظماسی وار
بیر کسه فاش ایلمور گوز یاشی هی گوزدن آخار
سن چاغیر اول دیده‌ی گریانی ساخلا ای بقیع
- شنبه
- 4
- اردیبهشت
- 1400
- ساعت
- 16:55
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه