گوز آچ ای مصطفانین یادگاری
علینون غم گونونده - غمگساری
عبادت وقتیدور نازیله یاتما
علینون بیر کسی یوخ - گوزدن آتما
اویان شمع وصالی بیر آلیشدیر
باشون اوسته منِ زاری دانیشدیر
نه تز جاندان علینون جانی دویدون
آناسیز زینب محزونی قویدون
نه تز زهرا وصالین شمعی سوندی
سرشگیم گوزده سن سیز قانه دوندی
نه تز کسدون عم اوغلوندان علاقه
نه نوعی صبر ایدوم من بو فراقه
نه تز عمرون گونی یتدی زواله
علینون باشینی سالدون ملاله
آخور گوزدن گوزوم یاشی ترابه
سسون قربانی سس - بو ترابه
کیمه درد دلیمی ایلیوم فاش
ئولیدی مرتضی بو غمده ای کاش
ازل گوندن نه بو هجران اولیدی
نه قلبیم فرقتونده قان اولیدی
نه اعدا درگهیوی یاندیریدی
ووریدی نه قولووی سیندیریدی
او حالدا سن گلیدون نه، فغانه
ووریدی قنفذ دون تازیانه
نه سینن توش میخِ در اولیدی
قیزون زینب نه بی‌مادر اولیدی
نه پشت درده القانه باتیدون
بیله نه زینبی گوزدن آتیدون
نه رنگون گل کیمی زهرا سولیدی
نه محسن ظلم الیله سقط اولیدی
نه قیزلارون باشا قاره سالیدی
علی نه حالیوه آغلار قالیدی
حسینون نه گلیدی آه و زاره
گجیله نه گیدیدون سن مزاره
نجه گلموم بو غمده پیچ و تابه
منی هجرون سالوبدور اضطرابه
سرشگون بنزدوب ابره عم اوغلون
نجه قویسون سنی قبره عم‌اوغلون
غم هجراندا زهرا نیلیوم من
بقیع دشتین نجه ترک ایلیوم من
نجه سنسیز ایوه بیرده گیدوم من
نجه قیزلاریوی آرام ایدوم من
توکر بو غمده "هاتف"اشگ حسرت
نجه ویرموم اونا قول شفاعت
- شنبه
- 4
- اردیبهشت
- 1400
- ساعت
- 16:57
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه