بار الها خاطر ختمِ رُسُل خَیرالورا
رحمتونله ایله ایراندان اوزون دفع بلا
بندهٔ نالایقم حالی پریشان روسیاه
دست خالی دل شکسته - دیده گریان - دلده آه
آگهم جرم و خطاده عمرومی ایتدیم تباه
درگهونده ایلورم عجزیله اقرار گناه
حضرت زهرایه خاطر ناامید ایتمه خدا
آند ویرّم حضرت صاحب زمانین جانینه
شیر حقّین سجده‌ده ناحق توکولموش قانینه
رحمتاً باخ شیعیانین دیده‌ی گریانینه
رحم ایله عورت اوشاقین ناله و افغانینه
قویما امّت درد بی‌درمانه اولسون مبتلا
کشوری که اوندا مدفوندی امام هشتمین
جدّی ختم‌الانبیاء تک رحمة للعالمین
سایه‌سار رحمتینده هر زمان ایران زمین
لیک اولدوخ درد بی‌درمان الیندن دلغمین
ایلروخ درگاهیوه حسرتله دلدن التجا
گرچه وار بیر عدّه‌لر شیطانه ایمانین ساتیر
بیرنچه دیناره خاطر سنگ وجدانین آتیر
بی‌خبردور منجلاب ظلمه سر تا پا باتیر
بعضی ایوده چوخ گیجه عورت اوشاقلار آج یاتیر
اهل عیالیندن خجالتدور پریشان حال آتا
بیر نچه الله اکبر سسلین - تزویرکار
صورتاً آدم نمادور - سیرتاً حیوان تبار
مفسد فی الارض - خائن - ظاهراً سرمایه‌دار
ایله مایحتاجینی خلقین ایدوبدور احتکار
نامسلماندا بو نوعی ایلمز - ظلم و جفا
ای خداوند رئوف و لایزال و لا مکان
هر طرفدن اولموشوخ تیر مصیباته نشان
امّت بیچاره‌ده یوخدور داخی تاب و توان
اشگ مظلوم - آه طفل و ناله‌ی پیر و جوان
دمبدم ساعت به ساعت عرشه قالخار برملا
آند ویرّوخ کربلا دشتینده آخمیش قانلارا
باش ویروب باش اگمین مردان با وجدانلارا
سو کنارینده لب عطشان جان ویرن قربانلارا
باب رحمت آچ اوزون بو بینوا انسانلارا
سندن ئوزگه یوخدور ایتسون امّته لطف و عطا
"اکرمی" شعرون دعا ایت دوشمسون تاثیریدن
شعری گرچه شاعرین کسگین اولار شمشیریدن
یاز بیان ایله اوزون درد جوان و پیریدن
الامان - الغوث ظلم و فتنه و تزویریدن
ایش قالوب آللهه غمدن امّتی ایتسون رها
- یکشنبه
- 5
- اردیبهشت
- 1400
- ساعت
- 21:45
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه