سرشگ حسرت آخور چشم انتظاریمدان
سوروشموسان نیه بو غملی روزگاریمدان
ندور بو ناله چیخور قلب داغداریمدان
گیجه گونوز یانورام آهِ شعله باریمدان
خبر دوت ای گوزلیم حال احتضاریمدان
روادی اوت سالا عرشه منیم بو ناله‌لریم
قالانسا قلبیده عمرومجه حسرتیم کدریم
او بلبلم سینوب هجران الینده بال و پریم
نولار آخاندا گوزومدن دوباره اشگ تریم
سیله محبّت الون اشگیمی عذاریمدان
خبر دوت ای گوزلیم حال احتضاریمدان
شرار عشقیوه جان و دلیله یانمالیام
یولوندا باشیمه هر نه گله - دایانمالیام
چون عاشقم هامی بیر رنگیله بویانمالیام
اجازه ویرسن اگر سویگولوم دولانمالیام
دالونجا دوشموشم آواره اوز دیاریمدان
خبر دوت ای گوزلیم حال احتضاریمدان
بو نوعیله که سنه عرض احترامیم وار
سحر نسیمینه تاپشورموشام پیامیم وار
حضوره یوللامیشام بیر نچه کلامیم وار
هایاندا اولسان اورکدن سنه سلامیم وار
اوزون زمان خبریم یوخ وفالی یاریمدان
خبر دوت ای گوزلیم حال احتضاریمدان
گرکدی کونلومی سن‌سیز جهاندا قان ایلیم
بو جانی مین دفعه قربان یولوندا ویرمه لیم
اوتانیرام که دیم منده سن‌سیز ئولمه لیم
منی بو حالیمله کیم گوروب دیور ده لیم
گلوبدی تنگه هامی ائلّلر آه و زاریمدان
خبر دوت ای گوزلیم حال احتضاریمدان
وورولموشام بلوسن قاشلارون کمانه‌سینه
اورک اسیریدی زلف سیاه‌دانه‌سینه
خدنگ عشقیوی آت قلبیمون نشانه سینه
بو کونلومون قولاق آس - یاندیران ترانه‌سینه
گلونجه گیتمیه کاش جانیم اختیاریمدان
خبر دوت ای گوزلیم حال احتضاریمدان
نقدری یوللاریوا " هاتف " اگلشوب باخاجاخ
چاتاجاق عمری باشا - شمع تک یانوب آخاجاق
سنی‌ده آهیم اودی یاندیروب یقین یاخاجاق
منی اوزوم بلورم ییخسا حسرتون ییخاجاق
ئولنده‌ده گله‌جکدور بو سس مزاریمدان
خبر دوت ای گوزلیم حال احتضاریمدان
- یکشنبه
- 5
- اردیبهشت
- 1400
- ساعت
- 21:55
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه