قارداش باجون اورکده دولی درد و غم گیدر
شاماته سندن آیریلالی دیده نم گیدر
یثرب عزیزینون ایله دوندی دونرگه‌سی
اطرافینی آلوب نچه نامحترم گیدر
بیر عدّه یاسلی عورت اوشاق شمره دستگیر
پای پیاده - شام یولی- پیچ و خم گیدر
بیر اهل کاروان هامیسی تیره روزگار
گورموش تمام اهل جفادن ستم گیدر
بیر جمع داغدیده - گوزی یاشلی- دلغمین
تاتار و روم اسیریدی گویا - خدم گیدر
ناقه سوار اولوبدی پیمبر سلاله‌سی
دلخوش بو ماجرائیله قوم ظُلَم گیدر
فریاد ساربانلار الیندن بو یوللاری
اللرده قمچیسی منیله همقدم گیدر
کرب‌و‌بلایه اکبر و عباسیله گلن
شمر و سنانه همره اولوب دمبدم گیدر
ظلم اهلینه علی قیزی زانو خم ایلمز
بار بلادن اولموش اگر قدّی خم گیدر
عباسه ویر خبر آنام اوغلی داریخماسین
زینب آلوبدی چیگنینه قانلی علم‌گیدر
خولی ایوینده سن گیجه‌نی میهمانیدون
بولدوم باشون سراغینه زهرا ننم گیدر
فکریم قالوب جنازه‌وی کیم قبره تاپشورار
منله سوار محمل اولوبدور بو غم‌گیدر
ایله دعا که شامه سلامت چاتاخ حسین
زنجیر ظلمه باغلیدی یورقون حرم گیدر
شامی یزید ایدوب اوزونه مرکز جفا
زینب بنای ظلمونی ایتسون عدم گیدر
قارداش بقای نهضت خونین کربلا
من شام شومی یک تنه فتح ایتمسم گیدر
من که سنه دویونجا حسین آغلیانمادیم
قبره منیله نیسگلون هر آن ئولم - گیدر
نه اربعین، نه ایل دونومی آغلاسام اگر
فکر ایتمه دلده محنت و درد و الم گیدر
اولسا نصیب کرب و بلا - الده "اکرمی"
تلّ اوسته نوحه یازماقا - دفتر قلم گیدر
- یکشنبه
- 5
- اردیبهشت
- 1400
- ساعت
- 21:56
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه