یاز قلم آز قالدی چاتسون آخره ماهِ صفر
باشلانوب دورِ فلکدن اهلبیته تازه - شر
ایلدی رحلت نبی اول سرور پیغمبران
غرق ماتم اولدی یکسر عرشیان - افلاکیان
ناله‌ی وا مصطفائیله دولوب گوشِ زمان
بو مصیبتده بجادور چشم گردون اولسا تر
عدّه ای عشق ریاست باده‌سیندن مست اولوب
تولانوبلار نفسه - پابند جهانِ پست اولوب
گوئیا شیطانیله یکرنگ اولوب همدست اولوب
َبر علیه امّت و اسلام ایتسون فتنه لر
یرده قالمیشدی وجود پاک ختم المرسلین
دفنینه مشغول اولوبدور بیر نچه اهل یقین
لیک بیر یاندا ثقیفه اهلی جمله مشرکین
دوشدولر فکره که نخلِ دینه وورسونلار - تبر
اُول منافقلرله حتّی - اولدی شیطان همنشین
داندیلار طاهانین آخر حجّیده فرمایشین
نصب ایدوبلر یعنی طاهایه به ناحق جانشین
پیشوای دین اولوب، عثمان، ابوبکر و - عمر
آتدیلار ایمان داشین بدعت یولوندا دوردولار
حقّینی حق صاحبین آلسونلا - شورا قوردولار
آستانِ جبرئیلی اوت ووروب یاندوردولار
دللّره دوشدی او گوندن ماجرای پشت در
تا آچیلدی اشگ زهرائیله ایسلانمیش قاپی
آتش بغض و عنادیله الوولانمیش قاپی
نیلدی یابن الحسن زهرایه اودلانمیش قاپی
شرحینی بو ماجرانین فضّه‌دن گَل آل خبر
فضّه‌نی سسلندی داده- آه یا صاحب زمان
دادینه امّا گلونجه فضّه اولموشدی اولان
کائنات اهلی بو غمدن اولدی یکسر باغریقان
تا گوروبلر سینه‌سین مجروح ایدوب مسمار - در
گلشن پیغمبر اولدی ظلم الینده پایمال
قالدی زهرا بین دیواریله در - آشفته حال
تا گوز آچدی بی وفا لر گوردی ایلور قیل و قال
گوئیا قالمیشدی روبه پنجه سینده - شیر نر
باغلیوب شیر خدانین بیعت اوسته اللرین
سیندیروب زاغ و زغن شهباز تک بال و پرین
بو ستم درده گتوردی روحینی پیغمبرین
چرخ چارمده مسیحایه ایدوب آهی اثر
حُبّ دنیا امّتی ایتمیشدی بیر نوعی جری
دست‌بسته مسجده ساری چکوردی حیدری
ضعفیله زهرا دوتوب دامان شیر داوری
حقّیله باطل آرا اولدی کشاکش بیر قدر
بو مصیبتدن ندن دنیانی ویران اولمادی
حقّه جانب دورماقا بیر کیمده ایمان اولمادی
اولماقا زهرایه حامی - بیر مسلمان اولمادی
هیزم نیم‌سوز الیندن فاطمه چکدی نلر
بو کشاکش یادیمه سالدی بیر آیری منظره
قتلگاه کربلا اولدی مجسّم یکسره
دختر شیر خدا ال آتدی قانلی خنجره
اوز امامیندن حمایت ایتسون اول صدّیقه فر
مرحبا زینب که اورگنمیشدی عفّت درسینی
اورگدوب شخصاً اوزی مولا شجاعت درسینی
مکتب زهرادن آلمیشدی شهامت درسینی
سینه‌سین زهرا آناسی تک غمه ایتدی - سپر
بیر یاریم‌گونده هامی آماله اولدی مبتلا
هم سویولدی هم دویولدی دختر شاهِ ولا
آشکار اولدی قیامت کربلاده برملا
ای عجب اولموشدی رستاخیز اعظم جلوه‌گر
خوف و وحشتدن اسردی خرداجا تیهولری
ایتمدی قلبه اثر هیچ نغمه یاهو لری
قمچی دگدی قیزلارا نیلی اولوب بازولری
ای دیلیم لال اول - داخی ایله بیانون مختصر
"اکرمی" دنیاده عمروندن نقدر اولسا مجال
درگهِ پاک حسین ابن علیده سنده قال
هر چتین حاجاتون ایسته حضرت زهرادن آل
اوغلونا خاطر آنا- ایتمز غلامین دیده، تر
- سه شنبه
- 7
- اردیبهشت
- 1400
- ساعت
- 20:13
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه