بشر پابند وجدان اول- گیدوب ابلیسه یار اولما
واروندی عزّت نفسون بو قدری کین شعار اولما
دیانتدن اوزاخلاشما- حقیقتدن کنار اولما
قولاق ویر پند درویشه- نصیحتدن فرار اولما
دولاشما اهل عرفانه- منافق کجمدار اولما
حسینچی اولموسان اولما- یزیده جیره‌خوار اولما
نقدری گور فضیلت وار- حسینون آستانینده
ایکی دنیاده عزّت وار- حسینون آستانینده
جلال و جاه و حشمت وار- حسینون آستانینده
تجلّی‌گاه رحمت وار- حسینون آستانینده
سراج معنویّت وار- حسینون آستانینده
قوجالدوقجا چوخ حرمت وار- حسینون آستانیندا
حسین بن علیدن غیرینه خدمتگزار اولما
حسینچی اولموسان اولما- یزید ه جیره‌خوار اولما
او کس کی سنّت پیغمبره قائل مسلماندی
هامی عمرونده دائم پیرو احکام قرآندی
نمونه دانش‌آموز کلاس دین و ایماندی
باش اگمز ظلم و تزویره نه چون آزاده انساندی
اونا انسان دیمه باشدان باشا تندیس وجداندی
او شخصین رهبر و فرماندهی شاه شهیداندی
حقیقت‌بین اول ارزشدن اوزون سالدیرما خار اولما
اسنده قاره پرچملر- محرم اولجاقین هر ایل
گوزوندن گوئیا اوخ سانجیلور واللّهی ای جاهل
گیدوب شیطان یولوندا ایتموسن اوز عمرووی زائل
سالوبدور قلبیوه کینه - ایدوب اندیشه‌وی باطل
اوقدری اولموسان شور و شعور و عشقیدن غافل
عزاداری گورنده طعن و توهینه آچورسان دیل
عمر سعد لعین تک نانجیب و نابکار اولما
حسینچی اولموسان اولما- یزیده جیره‌خوار اولما
بودور شاهِ شهیدانین مرامی قانلی نهضتدن
گیچر مرد خدا باشدان هراس ایتمز شهادتدن
یری گلسه کفن‌پوش ایلر اوز اوغلون درایتدن
که بلکه درس آلا آینده نسلی بو همیّتدن
یزیده بیعت ایتمز صود امرده اهلِ عزّتدن
دیردی خنجر آلتیندا - ئولوم شیریندی ذلّتدن
حسینه اقتدا، ائت، روز محشر اهلِ نار اولما
حسینچی اولموسان اولما- یزیده جیره‌خوار اولما
حسینون عاشقی بیجا یره اوز عشقینی آتماز
حسینون مکتبیندن درس آلان حرّیتین ساتماز
قرا کوینگ‌گیوب بهتان دانیشماز خلقی آلّاتماز
سرشگ چشمیدن غیری آخوب دامانین ایسلاتماز
نجه کی نغمه‌ی هیهات منّا الذّلّتی - باتماز
قسم اولسون علمداره حسینون پرچمی یاتماز
قرا پرچملره چپ باخما سن بی‌قید و عار اولما
حسینچی اولموسان اولما- یزیده جیره‌خوار اولما
گوروم مولا پسند اولسون سنون "هاتف" بو اشعارون
ایکی دنیاده اولسون شاه مردان یاورون یارون
ولی چیخسا الوندن گر عنانِ طبع و گفتارون
سوار مرکب تزویر ایدر اوز نفسِ بیمارون
کرم درگاهینه اولماز داخی زیبنده رفتارون
گرکدور لایق سلطان اولا اخلاق و کردارون
دو چهره مدّعی اولما- بیله بی‌بند و بار اولما
حسینچی اولموسان اولما- یزیده جیره‌خوار اولما
- سه شنبه
- 7
- اردیبهشت
- 1400
- ساعت
- 20:15
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه