بوگون ایتدی طلوع چرخ ولایت شمس تابانی
جمال انوری گون تک ایشیقلاندیردی دنیانی
قدم تا قویدی دنیایه علینون اوّلین اوغلی
سووندوردی علینی شاد قیلدی قلب طاهانی
ملائک دسته به دسته انوبلر عرش اعلادن
زیارت ایلسونلر تا گل زیبای - زهرانی
افقدن گوئیا گون چخدی نورین سالدی دنیایه
منوّر ایتدی گل رخساری کلّ کون و امکانی
ویروب امر خدائیله ملکلر عرشه پیرایه
بهشت عدنیده برپا اولوبدور بزم مهمانی
خانم زهرایه عرش اهلی مبارک باد عرض ایلور
عجب حال و هوا دولدورموش عرش حیّ و سبحانی
بو گونده لطفونی ایتدی عنایت خالق منّان
ویریبدور هدیه زهرایه بو طفل پاک و زیبانی
یارلدوب خَلقاً و خُلقاً باباسی احمده همتا
گورن سویلر گوزلّیقدا - بونون یوخ ذرّه نقصانی
دیسم آیدور غلطدور آیدا یوخ بو صورت زیبا
خجل ایلر بونون نور جمالی ماه رخشانی
دیسم گولدور، چمنده هانسی گولده بو طراوت وار
ایدوب مدهوش عطر نوگل زهرا - گلستانی
دیسم که لبلری یاقوتیله مرجانه بنزردور
بونون لعل لبی شرمنده ایلر درّ و مرجانی
دیسم بی‌جا دگول یوسف غلام درگهی اولموش
یاراتماز بیرده الله بو وجاهتده بیر انسانی
قویوب حیران سلیمانی اولان جاه و جلالیندن
ایدوب دیوانه عشقینده سالوب صحرایه موسانی
ایدر سرمست جامیندن شعیب و خضر و الیاسی
چکر بیر طرّه‌ی طرّاسی داره - مین مسیحانی
نجه تعریف ایدوم حُسنون خدایا قالمیشام حیران
قلم اعجاز ایله حلّ ایله بو مشگل معمّانی
بودور آئینه‌ی ایمان بودور سر منبع احسان
بودور شاهنشه دوران - بودور جود و کرم کانی
بودور شیرازه‌ی قرآت بودور یاسین و الرحمان
بودور زهرایه جسم و جان بودور محبوب یزدانی
بونون شانینده بو بسدور گورنده گل یوزون هر آن
دیردی دمبدم زهرا سنه قربان آنان جانی
بودور شیر خدا اوغلی بودور میر هدا اوغلی
بودور خیبرگشا اوغلی ایدوب دنیانی نورانی
بودور جان محمّد - مظهر احمد - گل سرمد
به لطف خالق ایزد سووندوردی احبّانی
عنایت ایله مولا "اکرمی" دائم چکر حسرت
مزار پاکیوه ایسته اوزون بو غرق عصیانی
- چهارشنبه
- 8
- اردیبهشت
- 1400
- ساعت
- 16:2
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه