اول دفتر به بسم الله رحمن الرحیم
ثانیا حقه پناهنده ز شیطان رجیم
ثالثا الطافین ارزان ایله دی حی کریم
رابعا ثبته یتوردوم زینب کبری آدین
خامسا یاز ای قلم زینب بیلر صبرین دادین
ای قلم زینب نه زینب نور پاک ایزدی
زینت افزای گلستان و حدیق احمدی
فاطمه ریحانه سی عشقین بهار سر مدی
گلشن پاک ولایتده گل خوش رایحه
فی قلوب مومنین دور یوخ نیازی مادحه
کیمدی زینب زینت نام علی المرتضی
کیمدی زینب اولیا آدینده سسلر حَبذا
کیمدی زینب عمرینون طولینده راضی بر قضا
دیللره دوشموش گوزل نام بلند آوازه سی
حُب زینبدور یقینا جنتین دروازه سی
عاشقانه عشق زینب دهریده مقیاسیدور
چشم حیرتلن باخان درگاهینه الیاسیدور
عشقیده همپایه تنها زینبه عباسیدور
زینبون تعریفی تنها ئوز کمالاتینده دور
مادر گیتی دوغا زینب محالاتینده دور
ای قلم زینب نه زینب لطفی دریادور خانم
هیبتینده غیرتینده همچو سقادور خانم
عالمه گلمز شبیهی مثل زهرادور خانم
سینمادی گرچه وجودی اولدی سر تا پا کبود
«کربلا در کربلا می ماند اگر زینب نبود»
آسمان عصمتین مهر فروزان جاهیدور
صاحب علم و بصیرت بانوی آگاهیدور
سرزمین حلم و صبرین عالی شاهنشاهیدور
هر بلا گلدی شجاعانه دوام ایتدی خانم
نهضت خون حسینی مستدام ایتدی خانم
کوفیه داخل اولاندا نیزه لر اوسته رئوس
آیه کهفی قرائت ایلیور فخرالشموش
سینه لرده اونداکی خوفیندن حبس اولدی نفوس
تیز و برنده بیانیله جهاد ایتدی خانم
لحن شیوائیله تفسیر معاد ایتدی خانم
گوش استبداده سالدی صوتینون آهنگینی
انقلاب کربلانین نشر ایدوب فرهنگینی
مرتضی تأیید ایدوب سجادینون سرهنگینی
صحبته دیل آچدی زینب حقی اِنشاد ایله دی
دودمان کفر و استبدادی بر باد ایله دی
قیلدی فرمایش یزیدون کاسه لیس پستی سوز
دین و ایماندان تهی، سیم و طلا نون مستی سوز
قتل ایدوب غارت ایدن غداره لر هم دستی سوز
یوخدی قورخوم بو شعاریمدور منیم قوم عِناد
مرگ بر آل امیه ، آل حیدر زنده باد
ایلیوب افشاگری دنیانی بیدار ایلرم
آبرو قویمام یزیده دهریده خوار ایلرم
اول خبیثی تختیدن ساللام نگون سار ایلرم
قصرینی ویران ایدوب عز و شرف کسب ایلرم
کاخ سبز اوسته ابالفضل پرچمین نصب ایلرم
درهم و دیناره ساتدوز دهریده ایمانوزی
نفسه خاطر پایمال ایتدوز او یوخ وجدانوزی
اشک تمساح، پاک ایدنمز لکه لی دامانوزی
روز و شب افغان ایدوب گوز یاشوز القانه دونه
حاشَ لِله قلبیده یاندیردیقوز آتش سونه
عالمینه سرورین وِیردوز عجب پاداشینی
ویرمیسوز مرآت حقه بغض و کینه داشینی
میزبانلار میهمانون ذبح ایدوبسوز باشینی
اوچ پر اوخنان سینه ی سیناسینی سیدیرمیسوز
قلب دخت حضرت طاهانی سیز یاندیرمیسوز
ارباً اربا دوغرادوز شهزاده ی زیباسینی
قلب قان ایتدوز علیِّ اکبرین لیلاسینی
سیز فَرَس پامالی ایتدوز قاسمون اعضاسینی
غربت ایچره آل طاهانی عجیبه یوخلادوز
تیر زهر آلودیلن بیر شیر خواری اوخلادوز
عترت پیغمبره سد ایلدوز سو یوللارین
سرو آل حیدرین ظلمیله سالدوز خوللارین
سیز قلم ایتدوز جفائیله اباالفضل قوللارین
قانه غرق ایتدوز آنام ام البنین گوز یاشینی
سو کنارینده سوسوز کسدوز اباالفضل باشینی
ظلمیلن چکدوز طنابه عترت پیغمبری
دیده گریان قلبی قان ایتدوز بتول اطهری
کوی و برزنده دولاندیردوز سیز آل حیدری
بامیلر اوستن نه بی شرمانه ایتدوز هلهله
حشریده جدیم رسوله ایلرم سیزدن گله
وای اولا سیز راهِ ابلیسِ زمانی خوشلادوز
هتک حرمت ایلیوب جور و جفانی باشلادوز
نیزه اوسته راس شاه کربلانی داشلادوز
باش سینوب قان آخدی القان اولدی شهلا گوزلری
«ثاقبا» اَل ساخلا یازما بسدی سوزان سوزلری
- چهارشنبه
- 8
- اردیبهشت
- 1400
- ساعت
- 16:37
- نوشته شده توسط
- یوسف اکبری
- شاعر:
-
کربلایی فخرالدین اسکندری
ارسال دیدگاه