قارداش حسین فراقیوه دیل داغلیام گرک
یاده سالوب مصیبتیوی آغلیام گرک
قورخوم بودور که طعنه وورا دشمنان دین
محکم دوروب خطا یولونی باغلیام گرک
قارداش حسین مزاریوین ئوزگه نماسی وار
افلاکیانه منظره ی دلرباسی وار
پایین پاده اکبر شهزاده دفن اولوب
علت اودور که آلتی جهت دن نماسی وار
قارداش حسین دویونجا سنه آغلیانمادیم
نعشین آلوب قوجاقه ئورک داغلیانمادیم
جبرا ً منی وورا وورا سندن آیردیلار
شرمندیم یارالاریوی باغلیانمادیم
قارداش حسین فراق اودونا یاندی زینبون
هر نه بلا گو روب دیدی آساندی زینبون
تنها رقیه نون گوزونی باغلیان گیجه
آه و نواسی گویلره قوزاندی زینبون
قارداش حسین یزید زماندان باج آلموشام
آل امیه نون جانینا لرزه سالموشام
اما رقیه ئولدی منیم اسدی دیزلریم
دورسان گوررسن ایندی نقدری قوجالموشام
قارداش حسین غم اوستونه غم گلدی شامیده
ویرانسراده داده ننم گلدی شامیده
اللی بش ایل مصیبته دوزدوم داریخمادیم
صبریم رقیه دن صورا کم گلدی شامیده
- پنج شنبه
- 9
- اردیبهشت
- 1400
- ساعت
- 16:0
- نوشته شده توسط
- یوسف اکبری
- شاعر:
-
مرتضی اسکندری
ارسال دیدگاه