طوطی گویای طبعیم رقص و جولان آختارور
کِلک احساسیم جوشوب جولانه میدان آختارور
گلشن خیرالوَراده گوللر آچمیش یکسره
غرق شور و ابتهاج اولموش یمین و میسره
صبح صادق ئوزطلوعیندن گوروب خوش منظره
طاق خضرا رشک ائدور غوغای سطح اغبره
کیمدی آیا بیله بیر غوغا سالوب عالملره
قدسیان تندیس رخسارین غزلخوان آختارور
دسته دسته عرشیدن فرشه گلوللر حوریان
صدر سینائیله رشک ایلور بو بزمه طوریان
ساقی صهبای عشقی سسلنور مخموریان
طوف پیک رحمته اجماع ائدوبلر لولیان
جوشه گلمیش زمزم و رأس الفرات ومولیان
نشئه گوزلر شاهد و شمع وشبستان آختارور
گوئیا تنویر دهره جلوۀ ایزد گلوب
جوش ائدوب دریای رحمت یرلره بی حدگلوب
عندلیبان سپهر عصمته سرمد گلوب
انبیا و اولیادن شانیده امجد گلوب
گویده آدی مصطفی یئرلرده کی احمد گلوب
عالم معناده بو شأنی سلیمان آختارور
بیشۀ کفر و نفاقه گلدی عالی شاهباز
آدی رکن دینیدور اسلامه والا امتیاز
انجلا تاپسون قیامیندن فروعات و نماز
بیرق اسلام سالسون دهره بوندان اهتزاز
وامدار تاج کرّمنادی سلطان حجاز
جاهلیت خاص وعامی بیله سلطان آختارور
طلعتی شمسُ الضُّحیٰ مصداقینون تفسیریدور
زلفینون بیر تاری واللیلُ السَّجیٰ تعبیریدور
وجهی وجهُ اللٰهیدور نور الهُدیٰ تنویریدور
نُه رواق وشش جهات احساسینون تصویریدور
اَشهدُ اَنّ مُحمَّد (ص) ذکر عالمگیریدور
سسلنر بو ذکری کیم عُقباده رجحان آختاور
وئردی تا زینت جهانه نور یزدانی بوگون
لرزیه دوشدی مدائن طاق ایوانی بوگون
لات و عُزّیٰ و هُبَل لر اولدیلار فانی بوگون
ساوه نین دریاچه سی خشک اولدی بیرآنی بوگون
قویمیوبلار آسماندا سِیره شیطانی بوگون
درک ائدنلر ماجرانی فعله برهان آختارور
جوشدی آب ناب وعطرآگین سَماوه شهرینه
فارس آتشگاهی خاموش اولدی رحمت بحرینه
خط بُطلان چکدیلر جادوگرانین سِحرینه
شاهیلر تختی نگونسار اولدی ایزد قهرینه
حق سالوبدور مکّه دن بیر نور،طاق دهرینه
ایله بیرنوراولدیکی گون اوندان امکان آختارور
مرحبا مرصوص و پابرجا قالان بنیادینه
شکّی یوخ دوت میندن آرتوخ معجزه وارآدینه
ایلیوب شق القمر باخ ثبت اولان اسنادینه
ردّ شمس ائتدی علی حقینده حقّ امدادینه
عشق اولا بیر بیله دین و مکتبین هر زادینه
جلوه گاه عشق جانان لطف شایان آختارور
آتمیش اوچ ایل وار کی تبلیغ ایلیوب اسلامینی
ایچدیروبدور تشنگان کوثره حق جامینی
سیلدیروب تاریخیدن سفیانیانین نامینی
بوریای عشقیلن تزئین ائدوب احرامینی
جاری ائتدی سربه سر آفاقه دین احکامینی
گرچه ایندی مدعی عهدینده نقصان آختارور
وارنئجه مجنون جنون تاجین کی لیلادن آلوب
گوز ضیاسین یوسف کنعان زلیخادن آلوب
یا کلیم ِ عشق عشقین طور سینادن آلوب
اعتقاداتین ولیکن شیعه طاهادن آلوب
هم اون ایکّی ماهپاره همّی زهرادن آلوب
مدّعی بیلمم نه دن ردّینده برهان آختارور
عرشیده عیسی بونون اولادینه پرچم دوتار
مقدمیندن خضر و الیاسیله یحییٰ دم دوتار
دامنین محشر گونونده نوحیلن آدم دوتار
دامن زهراسینی والله او گون عالم دوتار
کیم شفاعت ایستیوربو حصنی مستحکم دوتار
نار ِ دوزخدن اگر راه گریزان آختارور
نابجادور فکر ائداخ بیرکس اونا همتا گلر
سینه سی علم لدنّی دن دولی دریا گلر
صُلب پاکیندن بونون انسیّۀ حورا گلر
صُلب زهرادن حسین و تِسعة ٌمولا گلر
نائبان ِ وامدار ِ تاج ِ کرّمنا گلر
منتظر گوزلر هلال ماه شعبان آختارور
لطف حقدن دور«مصیب»طبعین اولموش گر روان
سعی ائله سینّون قوجالدیقجا اولا شعرین جوان
شکر لله اهل بیته اولموسان مِدحت یازان
یاز بو یازماقلا حصار قبریوه توشه قازان
دامنیندن چهارده معصومین اولسان مُستعان
قورخما عزرائیل اودمدن کی گلوب جان آختارور
- پنج شنبه
- 9
- اردیبهشت
- 1400
- ساعت
- 16:26
- نوشته شده توسط
- یوسف اکبری
- شاعر:
-
محمد علی مصیبی
ارسال دیدگاه