ای دردی اولان بنده دینن یا زینب
قال قلعه ی ایمنده دینن یا زینب
کیمدور بوخانم قلعه ی مستحکمدی
ایمنده دی هر کیم آدینا محرمدی
درمان سیز اولان دردیلره مرهمدی
چون باب الحوائج دی سوزی محکمدی
محکم دی بو پرونده دینن یا زینب
قال قلعه ی ایمنده دینن یا زینب
کیمدور بو خانم دایره ی امکاندا
همتاسی تاپولمازدی اونون دوراندا
سسلور آدونی شاه و گدا بحراندا
هردکتر حاذق که قالور درماندا
سسلور آدونی سنده دینن یا زینب
قال قلعه ی ایمنده دینن یا زینب
کیم سسلسه بو آدی پشیمان اولماز
اوّل گیجه قبرونده هراسان اولماز
محشرده گولر گوزلری گریان اولماز
شک ایلیه نون دردینه درمان اولماز
شک ایلمه کوبنده دینن یا زینب
قال قلعه ی ایمنده دینن یا زینب
کیمدور بو خانم عصاره ی خلقتدی
باشدان ایاقا نجابت و غیرتدی
مردان جهانه معرفت ئورگتدی
یانموش چادری مکتب حرّیتدی
اسلامی ایدوب زنده دینن یا زینب
قال قلعه ی ایمنده دینن یا زینب
کیمدور بو خانم گویده ملک لر تاجی
یرده هامی شاهلار آدینون محتاجی
ایمان و حیا بال و پر معراجی
بش یاشدان اولوب تیر بلا آما جی
بو عشقه برازنده دینن یا زینب
قال قلعه ی ایمنده دینن یا زینب
سر لوحه دی زهرا بالاسی ایثاره
سر سلسله دور زمره ی پرچمداره
قاتما گوزل آدون خانمون اغیاره
سسلن آدونی قالمیاسان آواره
احسن بیله فرزنده دینن یا زینب
قال قلعه ی ایمنده دینن یا زینب
کیمدوربوخانم حسنی دوتوب آفاقی
حیرتده قویوبدور عالمی انفاقی
جناته چتین توکون ویرر عشّا قی
زینبدی حجاب آیه سینون مصداقی
آنداولسون او روبنده دین یا زینب
قال قلعه ی ایمنده دینن یا زینب
- پنج شنبه
- 9
- اردیبهشت
- 1400
- ساعت
- 16:31
- نوشته شده توسط
- یوسف اکبری
- شاعر:
-
مرتضی اسکندری
ارسال دیدگاه