دونیا گئییندی قاره، یکسر حسینه خاطیر

قان آغلایێر بۇ آیدا، گؤزلر حسینه خاطیر

 

بۇ دهه‌ی-ی-محرّم، ایّام-ی-غم‌فزادی

هر شهر-وْ-هر دیار، اسلامیده عزادی

وۇر سینه سسله مولا، فرض ائیله کربلادی

اوْلسۇن عیان بۇ یئرده، محشر حسینه خاطیر

 

ائی قاره‌پوش اوْلانلار، جان یا حسین دییه‌نله‌ر

یۇخلار ادب مقام{؟}، مولاده یاخچێ نوکر

الآن گلیب عزایه، زهراده قاره معجر

یاندێم دییه‌ر اوْ غملی، مادر حسینه خاطیر

 

گر واردێ عئشق-ی-پاکون، آچ دیده‌ی-‌ی-بصیرت

دلده حسینی سسله، تاپ روح-ی-معنویت

حاکیمدی بۇ عزاده، باخ گؤز نئجه قیامت

مئحراب اوْخۇر سێزێلدار، منبر حسینه خاطیر

 

قان آغلایێب مَلک‌لر، کرب-وْ-بلا غمینده‌ن

جئبریل اؤپۆب حسین‌ین، پاکیزه مقدَمینده‌ن

سنده هایاندا گؤرسوْن، اؤپ قاره پرچَمینده‌ن

ساخلا اوْنۇ گؤز اۆسته، سرور حسینه خاطیر

 

گلدی دیار-ی-عئشقه، سلطان-ی-رادمردان

جانانه تُحفه گتدی، یئتمیش وفالی قۇربان

یوْخ گؤردۆ سۇ ائدیبدیر، طئفلان-ی-عئشقه ائعلام

یانسێن سۇسۇزلۇقۇندان، لب‌لر حسینه خاطیر

 

حئیران ائدیب حسین‌ین، ایثاری انبیانی

گؤردۆ بله‌شدی قانه، اکبر کیمی جوانی

گؤنده‌ردی تئز دالێجا، دلبند-ی-مُجتبانی

قاسم بوْغازین اؤپدۆ، خنجر حسینه خاطیر

 

قێزلار یانێب عطشده‌ن، سسله‌ردی دمبدم سۇ

عبّاس اوْ شیر-ی-مردان، مردافکن-ی-وفاجو

نهر-ی-فراته گلدی، سۇ آلدێ وئردی بازو

دۆشسۆن دئدی تُرابه، اللَر حسینه خاطیر

 

آلدێ گۆلۆن قۇجاغه، همّت‌لی باغبانی

بازار-ی-عئشقه گتدی، کالای‌-ی-پُر بهانی

پئیکان-ی-ظۆلمین اوْلدۇ، دلسیز بالا نیشانی

اۆچ شعبه تیری امدی، اصغر حسینه خاطیر

 

ائیله وضوء گله‌نده، بۇ بزم-ی-ارج‌داره

پاکیزه‌لیگده گلسین، نوکرلیگون عیاره

حُرمت یئتیر وضوءسی، آلقان اوْلان نیگاره

قوْی صدق-ی-عئشق اوْلسۇن، اظهر حسینه خاطیر

 

گر صاحب-ی-خطاسن، آلوده دامه‌نون وار

گئی قاره گل بۇ بزمه، دردون دواسین آختار

لقمان-ی-کلّ-ی-عالم، مظلوم حسینه یالوار

گئچسین خطالروندان، داور حسینه خاطیر

 

گر غۆصصه وار دیلوندا، باشۇن دۆشۆب بلایه

یا واردێ بیر مریضۇن، عاجیز قالێب دوایه

گل بۇردا نسخه یازدێر، سقّای-ی-نئینوایه

بیماری فورا" ائتسین، بهتر حسینه خاطیر

 

شاعر:  سید تقی سیفی اردبیلی