ای شیعه ی عرفانی ال چکمه نمازوندن
باس باغریوا قرآنی ال چکمه نمازوندن
ائت قلبیوی نورانی ال چکمه نمازوندن
تکمیل ائله ایمانی ال چکمه نمازوندن
سرکوب ائله شیطانی ال چکمه نمازوندن
بازار قیامتده سرمایه نمازوندی
ایمانوه قلبونده پیرایه نمازوندی
قبرونده گوزل مونس همسایه نمازوندی
رتبه یتورن عرش اعلایه نمازوندی
دوت شیوه ی تقوانی ال چکمه نمازوندن
حاتم تک اگر اولسان مشهور سخاوتده
معروف ضیافتده ممتاز کرامتده
بیر ذرّه ثمر یوخدی سست اولسان عبادتده
انفاقی نماز ایلر زیبنده قیامتده
مقبول ائدن احسانی ال چکمه نمازوندن
گیرم که گناهیله سنگین اولا پرونده
معبود حضورینه مغبون و سر افکنده
قوی آننوی تپراقه اول نادم و شرمنده
مولاسینه بیر بیله عصیان ائلمز بنده
بوشلا داخی طغیانی ال چکمه نمازوندن
- یکشنبه
- 12
- اردیبهشت
- 1400
- ساعت
- 20:20
- نوشته شده توسط
- یوسف اکبری
ارسال دیدگاه