اربعیندور سنه میهمانم حسین
منی دیندیر ئورگی قانم حسین
شه عطشان حسین سنه قربان حسین
گوزون آچ قدی کمان زینبیوم
غم الیندن قوجالان زینبیوم
قصرخضرایه دمشق ایچره حسین
نطقیله لرزه سالان زینبیوم
نالم عرشه اوجالیب آغلیارام
حشره جک دائم ئورک داغلیارام
باجون ئولسون پوزولان قبره باخوب
تازه دن باشه قرا باغلیارام
حرمون دور ئورگی قاندور حسین
قبرون اوسته گوزی گریاندور حسین
غم الیندن یورولان غنچه لرون
بابا سسلور هامی نالاندور حسین
سنه من قوم دغادن نه دیوم
قوم بی شرم وحیادن نه دیوم
کوفه و شامی گزوب گلدیم اخا
چکدیگیم جور و جفادن نه دیوم
چرخ دون سالدی بلایه باشیمی
دوندروب قانه آخان گوز یاشیمی
جوریله آلدی الیمدن گوزلیم
آناما بنذریمی یولداشیمی
گلشنیم بیرگون آرا سولدی حسین
غم ومحنت سینمه دولدی حسین
شام ویرانه ده یورقون بالاما
مجری قاره کفن اولدی حسین
قوی دیوم اولدی رقیم هارالی
قالدی ویرانه ده یثرب مارالی
موطنی اولدی خرابه بالامون
گوشوارین سنه گتدین یارالی
قاره سین سالدی فلک گور باشیما
باخمدی قانه دونن گوزیاشیما
دینن عباسیمه پیشوازه چیخا
بیر سوزوم وار اوجا بوی قارداشیما
یوزی نیلی قولاقی یاره بالام
غصه لی قلبی دوصد پاره بالام
هی دییردی عموما سویله بی بی
ایله سون دردیمه بیر چاره بالام
سوزی هرلحظه علی اکبریدی
ازبری لایلای علی اصغریدی
قبریمه سویله دی یاز اکبر آدین
عشقیم اول ماه ملک منظریدی
بیله فکرایمه بسترده ئولوب
توش اولوب قلبی غم ودرده ئولوب
خوش گونه حسرت اولوب عالم آرا
«ثاقبا» یاز بالام اللرده ئولوب
شه عطشان حسین سنه قربان حسین
- شنبه
- 18
- اردیبهشت
- 1400
- ساعت
- 13:48
- نوشته شده توسط
- یوسف اکبری
- شاعر:
-
کربلایی فخرالدین اسکندری
ارسال دیدگاه