بیر عمریدی معناده گرفتار حسینم
جان نقدینه شوقیله خریدار حسینم
.
چوخ مشتری وار عشقینه بازار ولاده
منده سبب گرمیِ بازار حسینم
.
لطف ایلسه دیدارینی قسمت ائدر اللّه
آگه دور ئوزی عاشق رُخسار حسینم
.
لقمانه دئیون دردیمی من عالمه وئرمم
فخر ایلیورم عالمه بیمار حسینم
.
بیر شاه، که عبّاس دئیوب نوکریم من
هر کیمسه نَدور سویلیه دلدار حسینم
.
بیر لشگره دورموشدی مقابل ئوزی عطشان
سسلندی که ای کوفه لی لر یار حسینم
.
ساقی اودی من مست میِ ساغر عشقم
میخانۀ وحدتده کی هشیار حسینم
.
باشیمده اگر سیره چخا نیزه لر اوسته
ثابتدی او، من سیریده سیّار حسینم
.
اذن اولسا اگر علقمی اخیامه گتورّم
اثبات ائدرم حیدر کرّار حسینم
.
پیغمبر عشقیمدی، گوزل آدینه قربان
بو عرصه ده من جعفر طیّار حسینم
.
.

قالدی سوزی اوستونده اباالفضل هُنَروَر
مردانه نبرد ائتدی او سقّای دلاور
.
.

تا دوشدی تراب اوسته او دلخسته علمدار
دوندردی یوزون جانبِ مولاسینه ناچار
.
آلدی نظره روی دل آرای حسینی
عرض ائتدی گل امدادیمه ای سیّد و سالار
.
هر چند سنه زحمت اولار گلمگون امّا
نعمتدی علمداریوه بو لحظۀ دیدار
.
سقّا سسینی آلدی حسین رنگی سارالدی
فرمایش ائدوب زینبه ای محرمِ اسرار
.
احساس ائدورم یخدی علمداریمی دشمن
جان اوسته منی سسلیور امدادینه سردار
.
امیّد حَرم ئولسه قولون باغلاناجاقدور
شامه کیمی صبر ایله سن ای عصمت دادار
.
قورتاردی سوزین مرکب رهوارینی میندی
آغلار گوزیلن علقمه گلدی شَه ابرار
.
بیر منظره گوردی دئدی سندی بئلیم الان
آچ گوزلریوی باخ منه ای قولسوز علمدار
.
معشوق سسین عاشق آلوب گوزلرین آچدی
عرض ایلدی عفو ایله بو یول زحمتین ای یار
.
بیر یاندا آنام فاطمه دور دیلده اوغول وای
بیر یاندادا جام الده دوروب حیدر کرّار
.
.

کوثر سویونی ایچمه میشم من سنه خاطر
سنده باشیم اوستونده گَل اگلش منه خاطر
.
.

گوز داغی وئرر دست خزان بُلبله قارداش
پرپر ائلیر دگسه بو اَل هر گُله قارداش
.
سن آغلاما دشمن سوُونر ای گُل زهرا
شبنم اوتوران گُل یوزیوی پاک اِئله قارداش
.
فکر ائتمه بدن یاره لی دور واردی گلایه م
عشق اهلی دوزَر غملره ائتمز گِله قارداش
.
وار فاصله سی پیکریمون اللریمیلن
دوشموشدی علمدار او زمان مشگله قارداش
.
قولسوز یخلوب توپراقون اوستونده سوروندوم
علّت اودی واردور آرادا فاصله قارداش
.
لطفون له منیم آب و گِلیم اولدی مُصفّا
عشقوندی وئرن روحی بو آب و گِله قارداش
.
سندیرما ئوزون، آل اَله تیغون دوراَیاقه
لشگر گوروسن ایندی ائدور هلهله قارداش
.
بیر سوز منه سن جنگه گلن وقته بویوردون
معیار او زمان جنگیده گلدی اَلَه قارداش
.
ئولدورمه دئدون چوخ بولاری زینبه خاطر
سخت اولدی ابوالفضلوه بو مسئله قارداش
.
هر مرحلۀ عشقیده صبر ایلدیم امّا
آلدی ایکی قول بیر گوزی بو مرحله قارداش
.
سن آتش هجرانه اورک داغلاما قارداش
اکبر غمی بسدی منه چوخ آغلاما قارداش