خلقتین شاهکاری زینبدی
عترتین نامداری زینبدی
صبریله آلدی قلّۀ ظفری
اُسوۀ پایداری زینبدی
بهترین بندۀ خداوندین
بهترین یادگاری زینبدی
خلقتی فصل فصل اگر ائلسوک
فصل سبز بهاری زینبدی
اوخشاسا یاخشی نطق شمشیره
خطبه نون ذوالفقاری زینبدی
گوزی باغلی اوخ آتسا گر غیرت
بوشا گیتمز شکاری زینبدی
آنالار افتخاری زهرادی
باجیلار افتخاری زینبدی
نهضت عشقه افتتاح ایلین
شرکت انحصاری زینبدی
شمع و پروانه نون روایتینون
راوی داغداری زینبدی
ماردی ئولدورن ابوالفضلین
خواهر باوقاری زینبدی
دینیمون تاجداری حیدردی
عشقیمین شهریاری زینبدی
عفّت و عصمتین خزانه سینون
شِمش خالص عیاری زینبدی
سینمیان اقتداری زینبدی
سیندیران ظلمکاری زینبدی
پهلوانلار علینی سسلسلر
قهرمانلار شعاری زینبدی
مستشار رشید مکتبدی
شیریدن صود اَموبدی زینبدی
فاطمی زاده دور اصالتی وار
اصلینون نسلینون وجاهتی وار
حوزه عشقیده مدّرسدی
مدرک محکم فضیلتی وار
غیرت و همّت و شجاعتده
اسداللهیلن رقابتی وار
جانشین اولماقا حسین آقاما
بیر فقط زینبین لیاقتی وار
آلنین ئوپدی بویوردی پیغمبر
عموسی حمزه تک صلابتی وار
نهضت کربلانی ساخلاماقا
شاه عطشانیدن وکالتی وار
کاروان کاروان شرافتی وار
آسمان آسمان نجابتی وار
بیرگونی عالم تخیّلده
طبعیمون گوردوم آیری حالتی وار
آختارور زینبین مقاماتین
مطلبی یازماقا حرارتی وار
یوز دولاندیردیم آسمانه طرف
گویده گوردوم شرف علامتی وار
یازیلوب سینۀ سماواته
غیرتین زینبه ارادتی وار
دیدیم ای آسمان بو طنطنووین
هانسی بیر شخصه چوخ شباهتی وار
دیدی سال فکریوه حساب ایله
سوزیمون مو به مو حقیقتی وار
نه کی تک کوه و دشت و دریایه
زینبین گویلره حکومتی وار
مدحینون رشته سی مطوّلدی
بیر توکی ماسوادن افضلدی
عالمه صبر وتابی ئورگتدی
روش انقلابی ئورگتدی
رهبران شریف و آگاهه
ظلمیدن اجتنابی ئورگتدی
بشره بین عزّت و ذلّت
بهترین انتخابی ئورگتدی
یرده عرش خدانی آختارانا
خانه بو ترابی ئورگتدی
اکبرین ئوپدی مه لقا یوزینه
تابشِ آفتابی ئورگتدی
شانه ووردی رقیّه نون ساچینا
عطر و بوی گلابی ئورگتدی
آنادان اولجاقین ابوالفضله
طیران عقابی ئورگتدی
خیمه لر اود دوتاندا طوفانه
رسم و راه ثوابی ئورگتدی
یاتمیان یَللره بیاباندا
لای لایِ ربابی ئورگتدی
قمچیلر آلتدا جمع نسوانه
راه حفظ حجابی ئورگتدی
محمل اوستونده باش یاراندا خانم
اهل عشقه خضابی ئورگتدی
کوفه نون بی وفا خانملارینا
آیه آیه کتابی ئورگتدی
آیریلاندا حسیندن،ئوز گوزینه
مشق درس سحابی ئورگتدی
باخدی باخدی دالیجا سلطانین
ایسلادوب اشک چشمی مژگانین
دیدی صبر ایله ای وفا کانی
بیر دانیشدیر بو خانه ویرانی
دیمورم گیتمه بزم جانانه
جان گزر چون وصال جانانی
گُل کیمی گُل یوزون شکفته لنوب
گورسنور سنده حال ربّانی
اللّی بش ائیلدی گورممیشدی باجون
سنده بو چهرۀ شکوفانی
اوخشامورسان هئچ اوغلی دوغرانانا
گورمورم حالت پریشانی
زینبوندن بو نوعی آیریلما
منی سیندیرما اولسا امکانی
ضربانیم حسین حسین سسلور
دوزه بیلمور باجون بو هجرانی
حاضرم اود دوتوب یانوب کول اولام
دوتا خاکستریم بیابانی
حاضرم آغلیام قیامته جک
گوز یاشیم غرق ایده بو صحرانی
حاضرم اوخلانام قباقونده
یووا قانیم بو قانلی میدانی
سنی ویررم قسم شرافتووه
ای وقارین یگانه سلطانی
آیریلیقدان فقط دانیشما حسین
هجرووین یوخدی منده درمانی
هرنگاهون هزار معجزه دی
ویر نشان معجزات موسانی
منی شمشیر ایله الونده آپار
دوغریوم رشته رشته اعدانی
قویمارام اسکیله وقاروندن
منی کم دوتما ذوالفقاروندن
زینبون جبهه دن کنار اولماز
خفّت و ذلّته دچار اولماز
روح سرکش واریمدی اوّلدن
روح سرکشده اختیار اولماز
ولی امر ایلسون کی خیمه ده قال
منه اجراسی ناگوار اولماز
گرچه چوخ سختیدور اسیر اولماق
ولی زینب اسیر عار اولماز
سربدار اولماسا مجاهدلر
آرمانلار پایدار اولماز
دین اسلامی ساخلارام زنده
زندگی یوخسا سازگار اولماز
معجر آلتیندا اولماسا پنهان
چهره پاکی آشکار اولماز
خواب غفلت دوتوبدی دشمنووی
قوردوقی خیمه استوار اولماز
بیلمیوللر کی خشم اقیانوس
بند و زنجیریلن مهار اولماز
خنجر منطقیم چکیلسه اگر
هئچ کسه فرصت فرار اولماز
حرمله اللّی اوخ رها ایلسه
زینبین غیرتی شکار اولماز
مطمئن اول کی آل بوسفیان
مرکب نصرته سوار اولماز
زنده بادا مرام آزادی
ذلّت انسانه افتخار اولماز
اصغرین قانین آللام آی قارداش
شهدا قانی استتار اولماز
- شنبه
- 25
- اردیبهشت
- 1400
- ساعت
- 21:30
- نوشته شده توسط
- یوسف اکبری
- شاعر:
-
استاد حسین غفاری اردبیلی
ارسال دیدگاه