سرور کل زنان مظهر عصمت زهرا
دختر ختم رسل نور نبوت زهرا
همسر نابغۀ شاه ولایت زهرا
نام نامیسی گوزل مام امامت زهرا
کفو بی مثل علی سمبل خلقت زهرا
مرحبا وحی ایوینون گوندن ایشیق مشعلینه
کوینگین طوی گجه سی سائله ویرمیش گلینه
یاراشور جامۀ تقوا او رسا هیکلینه
آتاسی ئوپدی الین وئردی علینون الینه
دیدی حفظ ایله قالور سنده امانت زهرا
دیسه لر کیمدی که صدّیقه مقام اولسون اونا
دییرم حضرت زهرادی سلام اولسون اونا
آستان بوس گرک خاصیله عام اولسون اونا
خادمه مریم و عیسی ده غلام اولسون اونا
سالوب عالم باشینا سایۀ رحمت زهرا
دیمه عیسانی کچتدیم که بیوکدور جاهی
بله تعریف ائلدیم حضرت روح اللّهی
عرشیدن پر عظمتدور خانمین درگاهی
که خداوند ئوزیدور فاطمه خاطر خواهی
گور تاپوب جمع کساده نه جلالت زهرا
ختم مرسل که اونا نازل اولوبدور قرآن
اونی گودوقجا دییردی سنه جانیم قربان
انبیاء قطره دی طاها،یم بی حدّ و کران
دنن عیسایه در زهراده تواضعله دایان
یره اگلشمه مگر وئرسه اجازه زهرا
دوگمه ای سائل اولان مردم دنیا قاپوسین
اولیادن خبر آل اهل تولّآ قاپوسین
سنه ویرسونله نشان عصمت کبرا قاپوسین
آند حسینون جاننا کیم دوگه زهرا قاپوسین
اولسا اخلاصی ایدر لطف و کرامت زهرا
پای میزاندا قیامت گونی یوم عرصات
امر اولار که هامی یومسون گوزون حتّی سادات
ناگهان جوّی بورور صوت سلام و صلوات
سس دوشر فاطمه گلدی آچیلار باب نجات
قویاجاق باشه اوگون تاج شفاعت زهرا
گوشۀ چشمیله محشرده کیمه باخسا بتول
یول تاپوب باب بهشته آلاجاق اذن دخول
دست زهراده دی آری سند ردّ و قبول
رفعت و شأنینه مبهوتیدی اوهام و عقول
بودی محبوبۀ ذات احدیّت زهرا
گلدی بیر گون ایوه مولا علی اول فخر جهان
یوز دوتوب دخت رسوله دیدی ای پاک روان
سفره آچ آجلیق عموغلوندان ایدوب سلب توان
هر نیون اولسا گتور اولما ملول و نگران
دگولم راضی سنه یوز ویره محنت زهرا
خانم عرض ایتدی نه امرون اولا ، لا یوخدی آقا
دیمه نسبت سنه زهراده وفا یوخدی آقا
نیلوم اوچ گوندی بو منزلده غذا یوخدی آقا
بالالاریم سارالوب دلده قوا یوخدی آقا
اولدی سندن بو تمنّاده خجالت زهرا
غیرت اللّهی بو سوزلر ایلدی غرق ملال
دیدی غصّه یمه ای بانوی ارزنده جلال
قویمارام آج قالاسوز اولما پریشان احوال
دلشکسته چخوب ایودن او مه برج کمال
ایدوب آردیجا دعا معدن عفّت زهرا
متفکّر دولانوب شهری او مظلوم حجاز
سمعینه یتدی اذان صوتی اولوب وقت نماز
ایتدی اللّهه توکّل دیدی ای بنده نواز
گیدورم مسجد پیغمبره گوستر اعجاز
بولوسن غصّه لیدور ایوده بو ساعت زهرا
مسجده وارد اولوب ذکر الهی دلده
روح قبله ئوزی مسجدده اورک منزلده
گوره مشکلدی علی فاطمه نی مشکلده
دمبدم شعله چکور درد اودی سوزان دلده
ایوده گوزلور یولونی روح عطوفت زهرا
اقتدا ایلدی پیغمبر اسلامه امام
گرم اولوب ذکر مناجاته نماز اولدی تمام
ایستدی منزله گیتسون چاغروب خیرالانام
یا علی گر اولا میلون سیزه مهمان اولّام
گوگلوم ایستور منی تز تز ایده رؤیت زهرا
ایشیدنده بو سوزی قلب علی قان اولدی
غملی قلبنده اولان غصّه دو چندان اولدی
ظاهراً خوش ولی باطنده پریشان اولدی
الغرض ختم رُسل حیدره مهمان اولدی
قاپونی دوگدولر آچدی گل جنّت زهرا
دوداقی گولدی بولوب مطلبی اول کان حیا
خیر مقدم دیدی خیرالبشره خیر نسا
خوش گلوبسن آتا جان ، جان بیله مهمانه فدا
اگلشون سفره آچوم حاضر اولار ایندی غذا
خوشدی سیز تک قوناقا ایلیه خدمت زهرا
درس اخلاقیدی نسوانه بیله استقبال
طرز برخورد بتول ایتدی علینی خوشحال
گیچدیلر منزله خندان ایکی فرخنده خصال
اولدی ایو صاحبی مهمانیله مشغول مقال
سفره پهن ایلدی مسئول ضیافت زهرا
مرتضی باخدی گوز آلتی او جوان همسرینه
اودا لبخند وروب یار ملک منظرینه
او تبسّمله وئروب قوّت دل شوهرینه
ایش قالوب فاطمه نین کشگل آچان اللرینه
گور نه تدبیر توکوب صاحب عزّت زهرا
گیچدی محرابینه سالدی باشا چادر شبینی
رو به قبله دایانوب آچدی دعایه لبینی
دیدی معبودینه قلبنده اولان مطلبینی
ایشیدوب گوش فلک زمزمۀ یا ربینی
اولوب اخلاصیله مشغول عبادت زهرا
معجرین فوری او ناموس خدا آلدی اله
عرض ایدوب درد دلین ساحت حیّ ازله
ای وئرن نوری ، ضیا زهریه ، جلوه زُحله
رحم ایله قویما خدایا اورگیم درده گله
راضی اولما قوناقندان چکه خجلت زهرا
یوخ سوزوم مصلحتون لطفودی احساندی منه
امتحانه دوزرم درد اوزی درماندی منه
سفره میز خالیدی همدم غم دوراندی منه
آتا یاننده اوجات باشیمی مهماندی منه
التماسه دل آچوب تا آلا حاجت زهرا
فاطمه نفسی غنی دور نِعَم عالمدن
اَکرم الضّیفه گوره آه اوجالور شینمدن
منه ده مائده گوندر قوتاروم بو غمدن
تا که بولسون هامی من کم دگولم مریمدن
ایستور عیسی آناسندان دوتا سبقت زهرا
الغرض تیر دعا سینۀ آهی دلدی
حاجتی اولدی برآورده خانم دینجلدی
یعنی زهرا ایوینه رزق بهشتی گلدی
هر نه حقدن بو خانم ایستَسه مشکل حلدی
مظهر فیضدی مصداق فضیلت زهرا
بلی زهرا دلین الله ئوزیده سندرماز
رشتۀ رابطه سین بیله خانمدان قِرماز
کیم مسلمان اولا زهرا قاپوسین یاندرماز
فدک اوسته یوزونه کوچه ده سیلی ورماز
خوش گونه قالدی نبی دن صورا حسرت زهرا
بار الها سنی ویرّم قسم آل اللّهه
او تهاجم گونی ظلمیله یانان درگاهه
غربت حیدره یعنی او قوشونسوز شاهه
قانلی مسمار ئوپن سینه ده سوزان آهه
معرفت ویر بیزه ده ، ایتسون عنایت زهرا
مجلس اُنس «کلامی» ئوزی خوش مائده دی
اهلینه خیریدی نا اهلینه بی فایده دی
شکر ایله شاکر اولان فیضه چاتار قاعده دی
بیر قدم نوره یاخونسان چون آنان سیّده دی
سنه ده بلکه باخا روز قیامت زهرا
- یکشنبه
- 26
- اردیبهشت
- 1400
- ساعت
- 18:28
- نوشته شده توسط
- یوسف اکبری
- شاعر:
-
ولی الله کلامی زنجانی
ارسال دیدگاه