یتمیش اولدوز سر نیده دولانور گون باشینا
هدف اولدی او گونون باشی عجوزه داشینا
آنینا ضربه دگوبدی گوز آچوبدی قاشینا
تازه قان عطری معطر الیییوب صحرانی
یارالی باش سر نیده اوخویور قرآنی
چاتدیلار کوفیه قول باغلی قوناقلار خسته
کاروان غمه زینبدی او گون سر دسته
عمه سی زینبه،تک تک،بالالار،وابسته
یورولوب ناقه ده قیزلار هاموسی دل داغلی
وارد مجلس اولوبدی اسرا قول باغلی
مجلسون جوین احاطه الیییوب کبروغرور
سویونور زاده ی مرجانه دورور،گه،اوتورور
محفل شومیده برپا اولونوب جشن و سرور
سر،مجلسده کنیزان و امیران اوتوروب
دور و ورده سفرائیله وزیران اوتوروب
جمع حاضرده او گون اهل شماتت چوخودی
هیچ بیرینده اولارین رحم و مروت یوخودی
سوزلری تک تکینون، ایله بیل اوچ پر اوخودی
ئورگی هیچ بیرینون یانموری حتی اوشاقا
ئورگشوب کوفه نون اهلی ویرا طعنه قوناقا
مجلس عامیده،ناگه ،اوجالیبدور فریاد
آچدی نحص آغزینی تا که دانیشا ابن زیاد
ویردی طعنه،اسرا جمعینه،اول بد بنیاد
دیدی الله بو جهاندا،بیزیچون یار اولدی
ئولدی عباس و حسین،خارجی لر خار اولدی
ایشیدیر ابن زیادین سوزونی ناخوش آقا
تبی واردی،دولانور گاهی صولا گاهی ساقا
ناگهان شیرخدانین قیزی دوردی ایاقا
دیدی یوم،نحص دهانین،پسر مرجانه
افترا باغلیوسان ،عترتیلن قرآنه؟؟
یوز دوتوب ابن زیاده نوه ی پیغمبر
دیدی من دختر زهرایم و جان حیدر
گیچدیم عباسیدن اما،سیزه ویرمم معجر
او حسینون آدینی سینه ده قاب ایلمیشم
گوز آچاندان ئوزومی وقف حجاب ایلمیشم
ای زیاد اوغلی ندن توسن ظلمی چاپیسان؟
بیزه توهین الییوب آدیوه عزت تاپیسان؟؟
فکر ایله گور کیمه فخریله منیت ساتیسان
زینبم یاخشی تانی،آینه ی روی علی
وار زبانیمده منیم،قدرت بازوی علی
در خیبر ،هله ده ،خاطری وار ،لولاسی
ئولمویوب بو سورونون،نایبه ی زهراسی
جیردی تل اوسته ابوالفضل سیزون قرطاسی
منده نطقیمله او شخصیتیزی سیندیررام
قولسوز عباس علمین بام دمشقه ویررام
ئوزون آللاتماگیلان ایله مشخص هدفین
اسرانین بو یالان سوزلریلن پوزما صفین
قسم اللهه سنون ذره یوخوندی شرفین
گر اولییدی شرفیز خیمه لری سویمازدیز
آل پیغمبره سیز،خارجی آد قویمازدیز
زینبم ،زین ابم،صاحب اصل و نسبم
منده وار فن بیان،بت شکنم،حق طلبم
طول تاریخیده من فخر زنان عربم
خواهر فضل و ابوالفضل و حسین و حسنم
قوللاریم باغلیدا اولسا گنه من شیرزنم
منه بهتان دیمیشن،قلبیمی گتدون درده
(ما رایت الا جمیلا)دیمیشم بی پرده
مشت محکم ویرارام نطقیمیلن نامرده
منطقیم بیرگونی عالمده جهانی اولاجاق
روضمه حضرت مهدی ئوزی بانی اولاجاق
- سه شنبه
- 28
- اردیبهشت
- 1400
- ساعت
- 12:51
- نوشته شده توسط
- یوسف اکبری
- شاعر:
-
بهلول حبیبی زنجانی
ارسال دیدگاه