قیامتین گونی گویدن یره ندا گله جاق
که اهل حقّه بو گون رحمت خدا گله جاق
خوشا رجب آیینون صائمین و قائمینه
که غیبدن اولارا لطف کبریا گله جاق
خدا بیزی رجبیّون صفینده محشور ائت
که اولّارون باشینا سایۀ ولا گله جاق
بلی رجب آییدی ماه رحمت و برکت
بو آیدا غم زده سائل لره عطا گله جاق
قدم قویوبدی جهانه بو آیدا اوچ معصوم
که آدلارین دوتانون روحینه صفا گله جاق
بو آیدا اولدی پیمبر رسالته مبعوث
داریخما چوخ ، اَلَه مقصود و مدّعا گله جاق
بو آیدا رحلت ائدوب فاطمه قیزی زینب
گر آغلاسان گوزیوه حشریده ضیا گله جاق
بو آیدا حضرت هادی شهادته یتیشوب
اونون الیله اؤرک دردینه دوا گله جاق
قلم گزور تاپا باب الحوائجین قاپوسین
آدین دئسم سسه سُکّان نه سما گله جاق
بو آیدا فاطمه موسی ابن جعفره آغلار
کیم اوخشاسا بالاسین مجلسه آنا گله جاق
قالوبدی گوشۀ زنداندا عمری قورتولدی
ائله دیَردی هاچان باشه ابتلا گله جاق
الهی فاتح ائله امتحاندا موسانی
مطیعیوَم باشا گر هر نه ماجرا گله جاق
عزیز بالالاریمی اون بیر ایلدی گورمه میشم
عیادته بو گئجه هانسی آشنا گله جاق؟
اگر اجابته یتسه دعای خلِّصنی
مدینه دن یانیما ختم الانبیا گله جاق
اگر چه محبس هاروندا بیر چراغ یانمور
چراغی نیلور او محبَس که مرتضی گله جاق
تنور خولیه آیا گئدن بورا گلمز؟
گلر یقین ، بُلورم خیرةالنسا ، گله جاق
آچین منیم قولومی بسدی ای نگهبانلار
منیم سراغیمه آخر بالام رضا گله جاق
سو وئرمیون منه خوشدی جگرلریم یانسون
سوسوز قوناق منه مظلوم کربلا گله جاق
ز بسکه زهر جفادن دوداقلاریم گوؤَریب
بقیعه چاتسا سسیم داده مجتبی گله جاق
هزار حیف اوزاقدی مدینه بغداده
خبر بلوب نجه تشییعه اقربا گله جاق
هایاندا قالمیسوز ای شیعیان خانه نشین
هراییمه بو گئجه شاه لافتی گله جاق
یازاندا نوحه «کلامی» اوخی دعای فرج
چک انتظار ، دئنن قان آلان آقا گله جاق
- سه شنبه
- 28
- اردیبهشت
- 1400
- ساعت
- 13:21
- نوشته شده توسط
- یوسف اکبری
- شاعر:
-
ولی الله کلامی زنجانی
ارسال دیدگاه