سالوب سس کوچه لرده یار و یولداش
حسینه ویردی الله نازلی قارداش
علمدار حسین دنیایه گلدی
مدینه غرق اولوب شور و نشاطه
دولوبدور قونشولار بیردن حیاطه
باخوللار دسته دسته بیر قماطه
ایدوللر نُقل، آی رخساره شاباش
علمدار حسین دنیایه گلدی
باجیلار قارداشا قربان دینده
اونی گهوارده زینب گورنده
دولانور باشنه مثل پرنده
اولوب امّ البنینه غصّه لر فاش
علمدار حسین دنیایه گلدی
خبر چاتدی حسینه گل تک آچدی
ایوه سرعتلن اول شهزاده قاچدی
ایاقینه قاچور کوینک دولاشدی
توکردی گوزلریندن شوقیدن یاش
علمدار حسین دنیایه گلدی
گلوب گوردی بشکده بیر بَلَک وار
گوزی آهو قوی بازو بِلَک وار
دیدی بوندا عجب اَنّی کورَک وار
اوزی آیدی دوداق غنچه قلم قاش
علمدار حسین دنیایه گلدی
دیدی لایلای منیم زیبا غزالیم
منیم آرخام ایلیم شیر جدالیم
اوجالسان سن،قوجالسام یوخ ملالیم
منه گلمز یاخون دعواده اوباش
علمدار حسین دنیایه گلدی
سنی من ساخلارام قارداش گوز اوسته
بشکدن قویمارام دوشسن یوز اوسته
حسن تک ایستورم دورّام سوز اوسته
منه الله سنی پای ویردی قارداش
علمدار حسین دنیایه گلدی
سنی من ساخلارام چون قدرتیم وار
جوانم ایندی من سن بیر لبن خوار
قوجالسام اول منه یار و هوادار
یامان گونده حسینه سنده چک باش
علمدار حسین دنیایه گلدی
امیرالمومنین گلدی ایشگدن
ایدیب تقدیر حسین تک بیر کشیکدن
آتوبدور اللرین دوتدی بشیکدن
دیدی بو صحنه نی گورمیدیم ایکاش
علمدار حسین دنیایه گلدی
بو بیر گوندور دیور عباسه لایلای
گلر بیرگون دیر وای قارداشیم وای
باتار قان دجله سینده بو گوزل آی
حسین آغلار گُلر اشرار اوباش
علمدار حسین دنیایه گلدی
اُلنجه چکمز ال مظلوم حسیندن
اوزون قوللار دوشر تپراقه تندن
گوتورمز ال قوشون السیز بدندن
قالار بیر حاله آغلار اوندا داغ داش
علمدار حسین دنیایه گلدی
گَل عینی فرده لطفون کامل ایله
اُپه قبرون جهاندا نایل ایله
ئورکده دردی واردی زایل ایله
اُلنجک درگهینده ایله فرّاش
علمدار حسین دنیایه گلدی
- سه شنبه
- 28
- اردیبهشت
- 1400
- ساعت
- 13:38
- نوشته شده توسط
- یوسف اکبری
ارسال دیدگاه