آی کربلا برنامون انقلابدی
تربتیوون ذرّه سی مشک نابدی
یل اسنده سینووه عطر قالخار
یاغش یاغسا توپراقیوا گُلابدی
آی کربلا عشقون سوزی سنده دی
چون خاتم العشقون اؤزی سنده دی
عابد گوزون تیکوب باغ بهشته
خازنِ جنّتون گوزی سنده دی
آی کربلا عشقه زمینه سن سن
صورت عارفه آئینه سن سن
یتمیش ایکی مجاهد کبیری
قوجاقلیان یارالی سینه سن سن
آی کربلا دیباچه سن ماتمه
غملی آدون دوداقلارا زمزمه
جَبَل الرّحمه دن باش ، تلِّ زینب
فراتی وئرمرم آب زمزمه
تعریفووه قصور اولسا منده دی
اؤزوم کیمی قَلَمده شرمنده دی
بیت المُقدَّسه افتخار ایله
مسیحه دم وئرن حسین سنده دی
آی کربلا آی یرلرون عزّتی
مُهروندی جانمازیمون زینتی
هئچ کیم سنون قدرتی یوخ ، سیندیرا
تربتیوه الله وئرن قیمتی
آی کربلا بساطون درد و غملی
بقعه لرون اوجا قرمز عَلَملی
اؤزوک اوستونده بذل ائدوب بارماقین
سلیمانون سلیماندان کرملی
آی کربلا شهیدلرون کفن سیز
یوسف لرون یاتوبدی پیرهن سیز
وصال اولان یر عاشقه وطندی
عشق اهلینه دئمک اولماز وطن سیز
آی کربلا خزان گورمز بهارون
بزندی لاله لردن غم دیارون
الله سنده آچوب خوان مغفرت
عارفلردی سفرونده ریزه خوارون
آی کربلا شهیدلری قوجاخلا
پریشان زلفون اکبرون داراخلا
گیزلت او تل تل یولونان تل لری
بیگانیه گورستمه یاخشی ساخلا
سنده اهل وفا اندازه لندی
هیکلِ دین ده جان تازه لندی
یارالاردان قان توکولدی فی المثل
ورقلنمیش قرآن شیرازه لندی
آی کربلا زینب نواسی سنده
رقیّه نون صوت عزاسی سنده
اصغر آناسی مظلومه ربابون
الآندا وار لایلای صداسی سنده
حسین عبّاس ایکی قارداش ناگران
آیری دوشوب بیر بیریندن باغریقان
ایکی قارداش فاصله لی یاتوبدی
آرالاریندا واردی بیر خیابان
علقمیوون داشلاندی سیلی گئتدی
کوسدی سودان رباب و لیلی گئتدی
اودوندا چوخ سویوندان چکدی فشار
قوناقلارون سندن گلِیلی گئتدی
اهل بیتون وارین الیندن آلدون
سرورین سالارین الیندن آلدون
زینبی میندیردون سنق محمله
گوزل جلودارین الیندن آلدون
محنت دریاسیندا اولار اوزدولر
یوزه اشکین مرواریسین دوزدولر
دولاندیلار مصیبت آسمانین
سو سو ، ووروب اولدوز کیمی سوزدولر
چوللره دل داغلی زنان داغیلدی
دلده صدای الامان داغیلدی
خیمه یاناندا کورپه لر فی المثل
رشته نی قیردیلار مرجان داغیلدی
من انورم محندن آیریلمارام
سوز اهلیَم سخندن آیریلمارام
آی کربلا تربتوندن آپارّام
قبریمده ده من سندن آیریلمارام
- چهارشنبه
- 29
- اردیبهشت
- 1400
- ساعت
- 20:17
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه