امر ایلدی خلیلینه خلاق ماسوا
اسماعیلی گرک ایده سن شوقیله فدا
آندیردی اوغلونا بو سوزی حضرت خلیل
ایستور فدا اوغول سنی خلاق بی دلیل
امر اِلهیه دیدی دلدن موافقم
هر امره سن رضا اولاسان منده شایقم
قلبی رقیق اولار آنون ایلمز توان
هاجردن ایتدیلر اودی که مطلبی نهان
حکم خدانی قویمادیلار بی عمل قالا
قربان گونی منایه گلوبدور آتا بالا
حاضر اولوبلا دائرۀ امتحانده
اوز اوغلونا دئدی آتا آخر زمانیده
اولسا وصیتون منه اوغلوم منه بیان ایله
هر بیر سوزون آنووا واروندور عیان ایله
عرض ایلدی واریمدی نچه خواهشیم آتا
سر منزله یاخوندی وفا قافلون چاتا
باغلا الیمی گوزلریمی شوقیله اوزون
باشیم کسنده گوزلریمه دوشمسون گوزون
باشسیز جنازه نی بابا حمل ایتمه منزله
بیرده مناده قال بو گیجه گیتمه منزله
مشگلدی چوخ مصیبته تاب ایده آنام
آسوده بلکه بو گیجه نی خواب ایده آنام
بیرده بابا سولاندا منیم عمر گلشنیم
باشیم کسنده قوی یوزیمی تپراقا منیم
ایتدی بیان هامی سوزونی ایلدون قبول
آخر سوزون ولی منی چوخ ایتدی دل ملول
گلشنده گل سولاندا دوشر یاپراق اوستونه
من قویمارام سنون یوزوی تپراق اوستونه
#گریز
ای جامۀ نشاطینی هر دهّه ده سویان
قاره گیوب آدینی حسین عاشقی قویان
بو مجلس عزاده گلون همّت ایلیک
دشت غمه خلیلون اوزین دعوت ایلیک
میدان کربلاده دوروب سینه داغلاسون
گلسون حسینون اکبرینه باخسون آغلاسون
تپراقلار اوسته گوردی حسین اوغلینون یوزون
قان لخته سی باشیندان آخوب دولدوروب گوزون
نظم وجودینی ووروب اوخ نیزه بیربیره
صد برگ گل کیمی داغیلوب گوئیا یره
معبودون عشقی باشدا دیز اوسته اوغول باشی
آز قالدی قان اولا او شهون گوزده گوز یاشی
قویدی یوزون اوغول یوزینه دینجَلَنمَدی
هی سسلدی آتا بالانی نطقه گلنمدی
بو صحنۀ بلانی ویرن اولمیوب سراق
باخدی آتا جوان بالاسی چالدی ال ایاق
آهیله سالدی عالم امکانه شور و شین
بیر کیمسه اولمادی دیه که آغلاما حسین
مشکل اولوب حسینینه درک ایتدی مسئله
زهرا قیزی یتوردی اوزین فوری مقتله
اولموشدی اشک ماتمه آلوده معجری
تلّی انوب قاچا قاچا اوخشوردی اکبری
ای محنتی حسینی سالان حالیدن حالا
ای برج معرفتده ایشیقلی آیوم بالا
وی دشت کربلایه آخان سو کیمی قانی
قربان اولا آخان قانوا عمّه وون جانی
بیر حالدا گوردی زینبینی شاه کربلا
یاددان چخوبدی اکبرینون دردی برملا
تاب ایتمدی باجیسنی اُول حالیده گوره
فوراً اوغول باشینی دیز اوستن قویوب یره
سنسیز دئدی دئمه اورگیم دینجلور بالا
مندن گلایه ایلمه عَمّون گلور بالا
یوخسا آتون قوراردی عزا مجلسی گنه
قویمازدی قان دوتان یوزوی تپراق اوستونه
دلده آدون قویوبدی گوزی یاشلی قزلاری
منله دانشموسان دو بیبونله دانش باری
- چهارشنبه
- 29
- اردیبهشت
- 1400
- ساعت
- 22:18
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه