ای قلم قبله ی ایماندی حسینون باجیسی
مظهر خالق یزدان دی حسینون باجیسی
زینت روضه ی رضواندی حسینون باجیسی
پیکر معرفته جاندی حسینون باجیسی
درد بیچاریه درمان دی حسینون باجیسی
قارداشی ئولدی خانم بوشلامادی میدانی
دشمنی خار ایله دی داغدان آغیر ایمانی
وارث خون شهیداندی حسینون باجیسی
معنی مصحف قرآندی حسینون باجیسی
شیر دخت شه مرداندی حسینون باجیسی
رگ غیرتده گزن قاندی حسینون باجیسی
حافظ ملت ایراندی حسینون باجیسی
زینبون آدی گلن یرده گرک شور اولسون
خانما آغلامیان دیده گرک کور اولسون
کیمدی زینب صدف معرفتون گوهریدی
زینت نام علیدور شرفون جوهریدی
نه فقط یر ، گویون اهلی خانما مشتریدی
دشمنی خوار ایلین باشدا قرا معجریدی
شمری مقتلده یوران حیدر اوپن اللریدی
مقتله گلدی دیدی اند اولا روح حسنه
نیزه باشینده کی باش تاج شرافتدی منه
کیمدی زینب گل بی خار گلستان ادب
نه عجم ده تایی واردورنه گوروب مثلین عرب
قامتین گورمه دی همسایه سیده یاللعجب
حرمتون حفظ ایله یازما خانما لهو و لعب
بو خانم ایتسه غضب ایلیر آلله دا غضب
خلقتی قطره حساب ایله خانم دریادی
باخماسا صبح قیامت بیزه واویلادی
کیمدی زینب ثمر نخل رسالتدی خانم
دختر نابغه ی شاه ولایت دی خانم
عالمه ، فاضله ، دیباچه ی غیرت دی خانم
صاحب تیغ بیان فن بلاغت دی خانم
چوخونا شامیده درس ادب ئورگتدی خانم
""ایندیده شامیده زینب اوجادان پرچم اسور""
پرچمون سایه سینه گیتماقا قلبیم تلسور
چاتورام مطلبه عذر ایستیورم زهرادن
کیچور اون دورده یاخون قرنیدی عاشورادن
دویمیوب گوش فلک ایندیده واویلادن
ایندیده وا اَبَتا صوتی گلور صحرادن
اصغره ویرمه دیلر آتلار ایچن دریادن
خیمه لر یاندی خانم دیل دولوسی قان اوتدی
بیر پارا خیمه تاپوب شام غریبان دوتدی
- چهارشنبه
- 29
- اردیبهشت
- 1400
- ساعت
- 22:58
- نوشته شده توسط
- یوسف اکبری
- شاعر:
-
مرتضی اسکندری
ارسال دیدگاه