الا ای طالب احسان اورکدن سسله یا زینب
گزیرسن دردینه درمان اورکدن سسله یا زینب
آماندیر قالما سرگردان اورکدن سسله یا زینب
مقدّس آدینا قربان اورکدن سسله یا زینب
اِئدر چوخ مشکلی آسان اورکدن سسله یا زینب
حسین کی ایسته دی اسلامه خاطر انقلاب اولسون
شریک نهضت ایستیردی بو امره انتخاب اولسون
دئدی بو قانلی نهضت زینبیله ناب ناب اولسون
گلنده زینبین آدی گَرَک حفظ حجاب اولسون
گتیر زینب آدین دلدن دیله تا فتح باب اولسون
بو امره منده وار ایمان اورکدن سسله یا زینب
اگر سن عاشق و دلدادهٔ اولاد طاهاسن
اگر سن طالب الطاف بی مانندِ زهراسن
اگر سن راهی ملک بقا و کسب عقباسن
اگر سن عارف حق علی و مهر مولاسن
اگر دنیا بویی غرق سؤالات و معمّاسن
ائدر هر مشکلی آسان اورکدن سسله یا زینب
نئجه تصویره چکسین زینبین اوصافینی خامه
نئجه دریانی یئر وئرمک اولار بیر خیرداجا جامه
باخیردیم صفحهٔ تاریخیده بیر قانلی فرجامه
حسینه کوفه نین اهلی یازیبدیر نئچّه مین نامه
دئدی اهل وعیالیم زینبیم قرباندی اسلامه
گل ای اسلامه پشتیبان اورکدن سسله یا زینب
عقیله دختر زهراعلینین باشینین تاجی
جهانه گلمییب گلمز بئله بیر مهربان باجی
اولوبدور کعبهٔ حُسنِ حسینه اوّلین حاجی
ائدیبدیر سینه ده ازبر بوتون اسرار معراجی
اونو رهبر تانیر ئوزعشقینه هر محنت آماجی
داریخسا قلبین ای انسان اورکدن سسله یا زینب
شهامت مکتبیندن رتبهٔ ممتاز آلیب زینب
علیدن ئورگنیب خطبه دمِ اعجاز آلیب زینب
حسیندن اخذ ائدیب درس شهادت راز آلیب زینب
همای رحمتیندن شهپر پرواز آلیب زینب
حسینین انتقامین خطبه سیلن باز آلیب زینب
ائدیبدیر کوفه نی لرزان اورکدن سسله یا زینب
اسیر عنوانی گلدی کوفییه اما امیر اولدی
امیر کاروانه بیر سینیق محمل سریر اولدی
سریرعزتین شیراوژنی بیر گونده پیر اولدی
او پیرعشق الفاظ شماتت زهر تیر اولدی
آچیلدی نطق گفتاری دییردین جانه سیر اولدی
اونا لطف ائیلدی یزدان اورکدن سسله یا زینب
بویوردی اُسْکُتُواْ، ساکت، هامی، پیر و جوان دوردی!
سکوت حاکم اولوب گویا دامارلار ایچره قان دوردی
دوه لر زنگی خاموش اولدی یکسر کاروان دوردی
سراسر کؤل سپن، طعنه وئران، یا داش آتان، دوردی
بئشیکده کؤرپه لر تیترشدی، وحشتدن، قاچان دوردی
یئنه جوشه گلیبدیر قان اورکدن سسله یا زینب
مخاطب قیلدی یکسر #کوفه اهلین زینب کبرا
دئدی مکر و خیانت سیزده دیر ای مردم دنیا
حسینی تشنه ئولدوردوز ندیر بو شورش و غوغا
گؤروم اعوانیزی انصاریزی حق ائیلسین رسوا
پوزولماز صفحهٔ تاریخیدن منشور عاشورا
آییلسین ملّت نادان اورکدن سسله یا زینب
یزیدین امرینه تابع عبیداللهِ مرجانه
گلَه لعنت زیادین اوغلونا اَتباعِ شیطانه
اونون فرمانینه تابع اولان بیر عده نادانه
عوامی آلّادیب شمشیر چکدی روی قرآنه
ایکی دنیا دچار اولدوزعذاب و درد و خُسرانه
بو گون حکم ائیلییر وجدان اورکدن سسله یا زینب
ایتی شمشیریلن یورش گتیردیز سیز قوناق اوسته
اوتانمیرسیز چکیرسیز طعنه ایلن داغی داغ اوسته
بَنی سفیانی رسوا اِئیلرم من اتّفاق اوسته
نه عنوانه تؤکورسیز کؤل ایشیقلی بیر چراغ اوسته
یانیب قلبیم داخی یاندیرمیون چوخ احتراق اوسته
یانیقلی قلبیم اولدو قان اورکدن سسله یا زینب
نه اندازه نمک نشناس و بی غیرت جماعتسیز
نَقدری بی مروّت بی هدف بی عار ملّتسیز
گئچیبدیر هجرتی آلتمیش بیر ایل سیز اهل بدعتسیز
سیز ای مردان کوفه باطناً عصمتسیزعورتسیز
اؤزوز یاخشی بیلیرسیز زیر بار ننگ و ذلّتسیز
دیلین قربانی زینب جان، اورکدن سسله یا زینب
خانم نطقین قوتاردی یاره لی قارداش دیله گلدی
وفالی باجیا قارداش صداسیندن صِله گلدی
گولون عطر و صفاسی قلبی یاره بولبوله گلدی
او اوچ گون آیریلیق گویا نظرده بیر ایله گلدی
اوخوردی آیهٔ کَهفی حسین، سس محمله گلدی
اورگین تاپسین اطمینان اورکدن سسله یا زینب
کی یعنی ذکرِاللّهیله قلبین مُطمئنّ اولسون
باجیمسان قویمادین گلزار دینین رونقی سولسون
دیریتدین نهضت خونینیمی دنیا بویی دولسون
سنین نطقین گرکدیر کاخ ظلمین ریشه سین یولسون
مبادا اشکیلن دشمن مصافینده گؤزون دولسون
یِئتر پایانه بو هجران اورکدن سسله یا زینب
او ساعت سسلدی زینب دیلین قربانی جان قارداش
دانیش اثباتِ حق اِئیله یارالی مهربان قارداش
اوزونده وار کول آثاری گؤزونده لخته قان قارداش
گلینلیکده منه سن دوتمیشیدین سایه بان قارداش
سنی بو حالتیلن گؤرمَه گَه یوخدور توان قارداش
پوزولدی گلشنِ خندان اورکدن سسله یازیب
باجی قارداشیلن درد دل ایلییر سوز و سازیلن
سَرِنی ده یارالی باش باخیردی چشم بازیلن
سینیق محملده بیر یورقون باجی دنیای رازیلن
بیری محمل نشیبینده بیری نیزه فرازیلن
بو گوللر پرورش تاپمیشدی مین اِعزاز و نازیلن
مدد قیل حجت یزدان اورکدن سسله یا زینب
یِئنه یاندیردیلار قلبِ بتولی کوفه اوباشی
بلالی زینبین دوشدی بلایه ناگهان باشی
کجاوه اوسته قول باغلی دؤنوبدور قانه گؤزیاشی
دؤزر هانسی باجی آیا او حالدا گؤرسه قارداشی
نه ظلم اولدی خداوندا بوتون آغلاتدی داغ داشی
بو آغلار گؤزلره قربان اورکدن سسله یا زینب
عجوزه غرفه دن باخدی یارالی باشه داش آتدی
نئجه گؤر کوفه نین ملعونه سی اؤزکامینه چاتدی
حسینین سجده گاهی پارچالاندی قانینه باتدی
بو محنت قورخولی قیزلاری چوخ شدّتله آغلاتدی
باجیدا باشینی یاردی اؤزون قارداشه اوخشاتدی
ایکی رخسار اولوب الوان اورکدن سسله یا زینب
اودور کی باش یارانلار ساخلییب الده بو معیاری
کی یعنی قانیلن امضا اولوندی عشق، طوماری
گرک زینب آدیلان خاتمه وِئرمک بو گفتاری
خانم مدِّ نظرده ساخلاسین جمله عزاداری
قوشول عاشقلره سنده دئنن صدقیله «ستاری»
مقدّس آدینا قربان اورکدن سسله یا زینب
- سه شنبه
- 4
- خرداد
- 1400
- ساعت
- 17:45
- نوشته شده توسط
- یوسف اکبری
- شاعر:
-
اکبر ستاری
ارسال دیدگاه