واریدوخ عمه وطنده اودا بیر گونلریدی
آغلارام یاده دوشنده اودا بیر گونلریدی
آغلیان وقته سیلردی علی اکبر گوزیمی
ناز ایدردیم اونا منده اودا بیر گونلریدی
حُسنی مین یوسف کنعانی اسیر ایلردی
زلفی اوخشاردی کمنده اودا بیر گونلریدی
واریادوندا که دولاردی گوزی عباس عمومون
یوزومی توزلی گورنده؟اودا بیر گونلریدی
ال چکردی بابام آهیله یتملر باشینا
تادوداقلار وار خندان اودا بیر گونلریدی
گونده اوچ وقتده بابام خلقه غذا پایلاردی
گوردون اول گونلری سنده اودا بیر گونلریدی
گوئیا بارش رحمت توکولردی باشیما
بابام آننمدان ئوپنده اودا بیر گونلردی
صبحه چان بستر راحتده یاتاردیم گجه لر
یوخودی یاره بدنده اودا بیر گونلریدی
او زمان غصّه منی بیر بیله یاندرمازدی
طعنه لی سوزایشیدنده،اودا بیر گونلریدی
ندن عمّه قوجالوبسان اوجاقدون واریدی
سرویدون صحن چمنده اودا بیر گونلریدی
رجب آینده وطندن آرالاندیق امّا
خوشودوق یودا گلنده اودا بیر گونلریدی
قارداشیم قویما زیدی قافله سرعتله گیده
ساربانلار تلنده اودا بیر گونلریدی
یغیلاردیق هَیجانیله ربابین باشینا
علی اصغر صود امنده اودا بیر گونلریدی
بابامی ایستورم ایندب اتگندن یاپشام
اورگیم دردینی جانانیله گیزلین دانشام
دیم ای سرور خوبان بودا بیر گوندی بابا
چخادوبسان منی یاددان بودا بیر گوندی بابا
سن که گیتدون سفره دوشدی رقیه خطره
اسدی بیر قورخولی طوفان بودا بیر گوندی بابا
کربلادن بورا جان سیای دگوب اوز گوزیمه
خسته جانیم سنه قربان بودا بیر گوندی بابا
او گیچن گونلریم ایکاش چخیدی یادّان
اولموشام مونس هجران بودا بیر گوندی بابا
منی دیندیر بابا غارتده یانوبدی اتگیم
بالاوام حالی پریشان بودا بیر گوندی بابا
ای طبیبم بو مریضلیق منی دلدن سالاجاق
تاپمورام دردیمه درمان بودا بیر گوندی بابا
باشیما قمچی دگنده دیمیشم یا عباس
داده گلمور او نگهبان بودا بیر گونده بابا
عمومون بس نه گلوبدی او اوزون قولارینا
ورور اعدا بیزی هر آن بودا بیر گوندی بابا
دولانیم باشیوه مندن سنی کیم آیری سالوب
اولا شمیرین ایوی ویران بودا بیر گوندی بابا
هارا گیتسن منی لطف ایله آپار ئوز یانیوا
غصه دن باغریم اولوب قان بودا بیر گوندی بابا
اوچ یاشندا قز هارا قمچی هارا سیلی هارا
گورهارا گلمیشم هارادان بودا بیر گوندی بابا
اوخشادیر غصه ده عمم منی زهرا آناما
چوخ جفا چکمیشم ای جان بودا بیر گوندی بابا
اونا بیر سیلی دگوب کوچه ده من گورمه میشم
دانشوب عمه نالان بودا بیر گوندی بابا
جان زهرایه قسم سیلی لرین تعدادین
سایا بلمم سنه الان بودا بیر گوندی بابا
- سه شنبه
- 4
- خرداد
- 1400
- ساعت
- 18:13
- نوشته شده توسط
- یوسف اکبری
- شاعر:
-
ولی الله کلامی زنجانی
ارسال دیدگاه