عزیز دل مصطفی یا حسن
اولان آدی درده دوا یا حسن
اوزینه خدا آینه خلق ایدیب
کریم همه اولیا یا حسن
آدوندان نمایاندی دلبرلیگون
گوزل آدیوه جان فدا یا حسن
یوزونده خدا جذبه خلق ایلییب
ئورکلر سنه مبتلا یا حسن
آتون حیدرین جانشین حقی
اولان شیعیه مقتدا یا حسن
نه لازم سنون درگهونده غلام
ملکلر قاپوندا گدا یا حسن
سنی خالقون مهربان خلق ایدیب
سنون سائلون شاد و خرّم گیدیب
ادب ملکونون تاجداری حسن
آناسی بتولین قراری حسن
علی خاندانی تماماً رئوف
کرم بحرینون چشمه ساری حسن
مقامون سنین فوق ادراکیدور
ولا اهلینون افتخاری حسن
منه مدعی عیب بیلمه اگر
دِیسم خلقتین شاهکاری حسن
دییم سربه سر عشقیدور،شوریدور
اوجا سسله سنده دِه آری حسن
شرافت سنون درگهونده دخیل
شرفلی لرین اعتباری حسن
سنون مثلووی گورمیوب روزگار
بدون حسن اولماروق رستگار
گوزلدور یوزی ماه کنعانیدن
جلالتده باشدور سلیمانیدن
نجه وصف ایدیم بو شهین وصفینی
کچیب مدحی توصیف انسانیدن
بونون شأنینی ایسته سه کیم بیله
سوال ایلسون متن قرانیدن
بونا نوکر اولماق بیزه فخریدور
واریم منّتیم حیّ رحمانیدن
اگر سیلکله سه آقام دامنین
توکر مین سلیمانی دامانیدن
هزاران چو حاتم بونا ریزه خوار
سر سفره لطف و احسانیدن
بونون درگهی سربه سر شوریدور
یوزونده اولان خالقین نوریدور
شرف درسینی ئورگدن عالمه
شبیهیدی پیغمبر خاتمه
خلاص ایلین نوحی طوفانیدن
تفضل ایدن عیسی مریمه
گوزل عز و جاهی نمایان اولار
قورولسا اگر حشریده محکمه
نیابت واری خالق عالمه
حسن دور ایدن امر هر آدمه
چاغیر یاحسن دردیوه قیل دوا
بونون آدی پایانیدور هر غمه
زبس حُسنی واردور بوشاهین بلی
اسیر اولمیوب نوکری ماتمه
اولان گوندن ای شاه ممنونووم
بو عشق و جنونیله مجنونووم
سخاوت بشر شکلی اولسا اگر
حسن محضرینده گلیب باش اَیَر
دوشوب سجدیه باش قویار تپراقا
ادب حکمینه اللریندن ئوپر
اوجا صوتیلن سسله نر عالمه
آقامین توکی عالمینه دَیَر
گوزل طلعتی بسکی رخشنده دور
حسن نه حسن صورتی چون قمر
چیخیب جنتی ترک ایدر صبح و شام
بونون پای بوسینه حورا گلر
اوچار گویلره فخریلن سسله نر
دییر اولموشام دیدینه مفتخر
بونا منتظردی بهشت برین
بونون خادمی اوردا روح الامین
حسن دور ایدن عالمه دلبری
حسن دور یر اوسته حقین مظهری
حسن دور صراط خدای احد
حسن دور زمین و زمان لنگری
بونون عاشقی سربه سر انبیا
بونون مستی جنتده حور و پری
بودور امته بی بدل پیشوا
بودور شیعه نون حشره جاق رهبری
یاراتمیش خدا مجتبانی آقا
دیه للر بیزه بو شهین نوکری
گونون نوری بو سرورین نوریدور
گونه پای ویریبدور رخ انوری
بونون عرشیده آیری بیر جاهی وار
بو زهرا کیمین یعنی دلخواهی وار
علی خصلت و حیدری صولتی
سالان عالمه طنطنه شوکتی
آقامین هزاران خصائل واری
دوشوب دیللره رفعتی رأفتی
یوزی چلچراغ سماواتیدور
آدی طاق عرشین اولان زینتی
حسندن اولوب دین حق سربلند
مسخّر ایدیب عالمی حشمتی
دمینده یقیناً بهشت عطری وار
مصفا ایدوب صورتی جنتی
جمل جنگینه ایلسون بیر نظر
بیلرسن نه اندازه وار غیرتی
گورنده بونی پهلوانلار اَسَر
قاچیب قورخودان هامّیسی گیزلَنر
یولا سالدی حیدر اودم شیری نی
چکه خیبرین بیرده تصویری نی
ویریبدور نقابین یوزه مجتبی
اوجالدیب گویه صوت تکبیری نی
الین آتدی تئز قبظه ی تیغینه
دییب یا علی چکدی شمشیری نی
گیدیب شیر غرّان جنگ جمل
ویریبدیر رقم جنگ تقدیری نی
گرک مرتضی اوغلونی وصف ایده
ایدیم من نجه رزم تفسیری نی
علی مثلی حیران ایدیب لشکری
علیدن آلیب جنگ تدبیری نی
چکیب تیغ خونریزینی تا حسن
ملکلر دیوب مرحبا یا حسن
سالیب عرصه ی جنگه بیر ولوله
گورن فکر ایدردی گلیب زلزله
قویاندا قدم رزمگاهه حسن
چتین اولدی میدانیده مسئله
بیلیبدیر بونون گلمگین تا قوشون
اولوب لشکر کفریده غلغله
دیینده انا بن علی،مجتبی
دوشوب پهلوانلار ایشی مشکله
چکیب تیغینی هی دیور یا علی
بیرینده ئورک یوخ قاباقه گله
ویریب لشکره شیر یزدان کیمی
قوتارسین دئدی ایستیرم قائله
پوزولدی سپاهین نظامی قاچور
علینون غیور اوغلونا یول آچور
ویراندا ئوزون یک تنه لشکره
دوشوب سس علی عزم ایدیب خیبره
علیدور دیین بیله جنگ ایلیور
ز بس اوخشاری واریدی حیدره
توکور اود قوشون باشینه مجتبی
جمل صحنه سین اوخشادیب محشره
کیم ایستیر باشین قوزاسین باخماقا
ویریر تیغینی باش توکوربدیر یره
الی سینه ده فاطمه عرشیده
فدایم دیور قان توکن اللره
آنون قلبینی قان ایدیبلر بولار
امان ویرمه اوغلوم بوگون کافره
اولییدیم یوزوندن ئوپیدیم گَرَک
آتون حیدره یاخچی اولدون کومک
ویریب بیربیره لشکرین هنگینی
نمایان ایدیب حیدرین جنگینی
قوشون قورخوسوندان قاچیر چوللره
ایدیب مضمحل خصم نیرنگینی
ایشیتجک حسن بیله غوغا سالیب
آتیب گوردولر عایشه رنگینی
همان لحظه ده تیتره دی قورخودان
گورن موقع میداندا اورنگینی
دیوب بو حسندور ایدور بیله جنگ
ویا اژدهادور آچیب چنگینی
بو طرزیله کی جنگ ایدیر مجتبی
ویریر شیشه ی عمرومه سنگینی
دوشوبدور ایشیم چوخ چتین مشکله
منیم دادیمه یوخدی بیر کس گله
- سه شنبه
- 4
- خرداد
- 1400
- ساعت
- 18:53
- نوشته شده توسط
- یوسف اکبری
- شاعر:
-
مهدی عابدینی
ارسال دیدگاه