واردی بو گون نه قیامت بارالها سامراده
غصه دن قانه دؤنوبدی اشک زهرا سامراده
عالمی ماتم دوتوبدی عترت پیغمبر آغلار
ایلیور جاری عذاره شیعه لر اشک تر آغلار
غربت ائلده بو غریبه یئرلر آغلارگویلر آغلار
آهیلن سسلور ملکلر وا اماما سامراده
تیتریور عرشین ستونی ماسوا مغموم اولوبدی
ظلم وجور اشقیادن عسکری مظلوم اولوبدی
حضرت زهرا عزیزی زهریلن مسموم اولوبدی
عرش اعلایه اوجالمیش شور و غوغا سامراده
کینه سین معلوم ائدوبدی ظلمیلن معتزّ ملعون
قائم آل عبانی ایلیوب بو غصه محزون
وا ابتا سسلینده ناله ایلور چرخ گردون
مجلس ماتم دوتوبدی آل طاها سامراده
ای گوزوم قانیاش تؤک آغلا اول غریب مبتلایه
سوزش زهر جفادن اودلانوب گلدی نوایه
گه ئوزون دوتدی بقیعه گه دؤلاندی سامرایه
سسلدی گه واحسن گه واحسینا سامراده
ای گوزوم آغلا او شاهه قلبینه غملر قالاندی
غربت ائلده اهل کینه عزتین قهریله داندی
سبط اکبر تک ستمله دوغرانوب اکبادی یاندی
ئولدوروب اول شاهی کامه چاتدی اعدا سامراده
یاندی آخر لحظه لرده چون شرار زهر کیندن
آلدی بیرکاسه سو حضرت اوغلی مهدینون الیندن
اول سوا باخدی حسین وای سسلدی یاندی غمیندن
باشلادی سو روضه سی اول غملی مولا سامراده
وای دئدیم جدّیم حسینون لبلری یاندی سوسوزدان
بیرگلستان لالهٔ خوش منظری یاندی سوسوزدان
یاننام الله شیرخواره اصغری یاندی سوسوزدان
آغلارام ششماهه طفله جان دوداقدا سامراده
وار یئری عرشه بلند ائتسم بو قلبین سوز وسازین
جدیمون یاد ایلسم گر اول شهید سر فرازین
اللری اوسته او شاهین اوچ پر اوخ بیچدی بوغازین
قویمیوب قلبیمده بو غم ایندی یارا سامراده
ئوز دوتوب سسلندی مهدی ای عدالت آفتابی
روز موعودون سئویندیر عترت ختمی مآبی
اصغرین آل انتقامین شاد ائله قلب ربابی
موج ائدور بو غمدن اشکیم مثل دریا سامراده
- سه شنبه
- 4
- خرداد
- 1400
- ساعت
- 19:0
- نوشته شده توسط
- یوسف اکبری
- شاعر:
-
علیرضا حضرتی (ناعمی)
ارسال دیدگاه