عاشقم بیر گُله من،عاشق اونا گُللردی
گُل نه گُل، گُل یوزی آئینه پیغمبردی
مین خزان گَلسه ده سولماز، بو گُل حیدردی
سایه سینده بو گُلون، مُلک و مَلک دالدالانور
گونده اوچ دفعه اونون باشینه، دنیا دولانور
گُل نه گُل، نوروینی بوندان آلوری شمس و قَمر
حیف دیر طلعتینی یوسفه اوخشاتسام اگر
تک بونون بیر باخیشی یوسف کنعانه دگر
نور ذات اَزَلی اون بیر امامین گوزودی
بو گُلون مُشتریسی حضرت زهرا ئوزودی
گُل نه گُل، رشک آپاران حُسنونه گُللردی بونون
دئمَرَم آی، ئوزی آیداندا منوِّردی بونون
حُسنونه بنده اولان جمله گوزللردی بونون
گلشن جنّت الاعلایه بو گُل، سؤ گُلی دی
باغ جنّت گُلی یوخ یوخ، دئنه زهرا گِلی دی
گُل نه گُل، مثلی نه گُلزار و نه گُلشنده اولار
باخسا آی حُسن دل آراسینه شرمنده اولار
گون دئدیم سهو ائلدیم، گون بو گُله بنده اولار
اهلبیتون گوزلی، شاهد حُسن اَزَلی
باغ جنّتده دئیلر بونا زهرا گوزلی
گُل نه گُل، حق بونی ئوز ذاتینه مظهر یارادیب
مَه جمالین بو گُلون مهردن اَنور یارادیب
دیمَرم یوسفه، پیغمبره مظهر یارادیب
تک نه یئرلرده، سمالرده بو دلبر سوزودی
گوزلری قاشلاری، سیماسی پیمبر ئوزودی
گُل نه گُل، شرح ائلیه وصفینی قاصردی زبان
گُل نه گُل، حُسنی ملک، غنچه لبی، قاشی کمان
گُل نه گُل، هر تِلینه باغلیدی مین حور جنان
بونی خلّاق اَزَل حُسن ازل خلق ایلیوب
گُل گوزلدور، بونی گُلدنده گوزل خلق ایلیوب
جمله دلخوشدی هره، بیر دل و بیر دلبرینه
هر کس ئوز یارینی تشبیه ائدی بیر تازه گُله
یئر یوزی دولسا گُلیله، گینه چاتماز بو گُله
روحیمیز روز اَزَلدن بو گُلون شایقیدی
تک نه بیز، حضرت زهراده بونون عاشقیدی
بیز که دنیانی فدا ایلَمیشوق عشقیمیزه
وئردوق ای مُدّعیلر جیفۀ دنیانی سیزه
بسدی تنها پسر فاطمه نین عشقی بیزه
ثبت اولوب دفتر عشّاقیده باشدا آدیمیز
مهدی فاطمه دیر ایمدی بیزیم هر زادیمیز
دئمیون یوخدی بیزیم، ساقی جان پروریمیز
دئمیون یوخدی بیزیم، سروریمیز، رهبریمیز
دئمیون یوخدی بیزیم، سؤگُللومیز، دلبریمیز
حُسنی آیداندا گوزل، دلبریمیز واردی بیزیم
یوسف فاطمه تک رهبریمیز واردی بیزیم
قوی نفاق اهلی دئسونلر بیزه دیوانه دیلر
نه تانور عشقی اولار، عشقیله بیگانه دیلر
اولارین سوزلری هم ئوزلری افسانه دیلر
عشق سرمستی بولر لذّت مستانه لیقی
وئرمه روق هر ایکی دنیایه بو دیوانه لیقی
بزم خلوتگه وحدتدی بیزیم هیئت میز
نام و شهرت نَدی، پرچمدی بیزیم شهرت میز
نیلروخ ثروتی، مهدی دی بیزیم ثروت میز
او بیزه عشقدی جانانه دی دلبردی بیزه
او گُل حضرت زهرادی، او رهبردی بیزه
گَل آقا مصئبۀ عدلی مقام ائت ئوزیوه
قویما حسرت قالا عاشقلریوی گُل یوزیوه
گَزمه گوز یاشلی بیابانلاری قربان گوزیوه
سنه زیبنده دی مؤمنلره سرور اولاسان
سنه تنها یاراشیر عالمه رهبر اولاسان
بیز حسین غملرینه، سینه میزی داغلیاروخ
نَقَدر واردی نفس، سینه ویروب آغلیاروخ
هر محرّمده قرا باشمیزه باغلیاروخ
دوداقین بوزمه محرّمده قرا باغلیانا
دوداقوندان چالی بیر یول دیساق عبّاس آقیا
«عدلجو» سانما که شاعر اولی هر نوحه یازان
اوچولار ائو، گوره معمارین ایشین قبر، قازان
هر گَلن نوحه یازان اولسا، نه لازمدی یازان
صدقیله نوحه دیوب آخسا اگر گوز یاشون
بونی بول نوحه یازاندان چوخ اولار پاداشون
- چهارشنبه
- 5
- خرداد
- 1400
- ساعت
- 20:31
- نوشته شده توسط
- یوسف اکبری
- شاعر:
-
احد عدلجوی تبریزی
ارسال دیدگاه