هئچ بیلوسوز بو صود اَمَر هانسی گولون گلابی دور
قلبیمی یاندیران بونون طاقت و صبر و تابی دور
غیرتین آسمانینون اولدوزودی عقابی دور
روحیمون انتخابی دور عشقیمون آفتابی دور
دوزدی کی شیرخواره دی معرفتین کتابی دور
ایلمیوبدی ایلمز بی سبب ادعا حسین
سیّد پاکزاده دی دست گره گشاسی وار
هرنفسینده مین طبق معجزه گر دواسی وار
فرشیدن آرتوق عرشیده عاشق جانفداسی وار
صبرایلیون تلسمیون بوردا بلا کلاسی وار
سینمون اوسته اوغلومون گورملی ماجراسی وار
بوردا بلا عمارتین ایلیه جک بنا حسین
تشنه دی تشنه لبلری من کیمی ظلمه لا دیه
پارچالانا دوداقلاری سجده ده ربّنا دیه
روح خدا مسیح تک حمد دیه ثنا دیه
غیرتینه سیغیشمیور مُفسده مقتدا دیه
ننگ اولا کیم ستمگره جانیم اولا فدا دیه
ایلمیوبدی ایلمز ظالمه التجا حسین
هرنه بویوردی الغرض اولمادی امری مستجاب
غالب اولوبدی لشکره سایۀ شوم التهاب
آلدی اَله کمانینی حرمله غرقِ اضطراب
ایلدی بیر سه پر اوخی اوخلار ایچیندن انتخاب
یر دئدی من باخانمارام گوی دیدی هارداسان رباب
اصغری باسدی باغرینا باشلادی ربّنا حسین
صاعقه مثلی ناگهان اوخ قوتاروب کمانیدن
ناله صداسی قوزانوب پهنۀ کهکشانیدن
سینه زنان فرشته لر گلدی یره جنانیدن
اوخ نجه اَندی اصغرین حلقینه آسمانیدن
قان اوشاقی قوجاقلادی دوشدی زبان بیانیدن
گوردی اونون یاراسینا تاپمیاجاق دوا حسین
اوخ گولونون بوغازینه گوردی باتوب تیکان کیمی
سینه سینه یاپیشدوروب غمزده باغبان کیمی
ئوپدی یاراسین ایگلدی قاسم نوجوان کیمی
باخدی مدینه سمتینه آغلادی آسمان کیمی
من اولا بیلمرم دیدی مادر مهربان کیمی
بسدی بو قدری آغلاما گوزلرووه فدا حسین
من دیدی ایستورم اوغول یارووی رویت ایلیوم
اوچ پر اوخون یاراسینا بلکه طبابت ایلیوم
چالما بو قدری اَل ایاق قوی سنی راحت ایلیوم
قوی بو اوخی چکیم چوله رفع جراحت ایلیوم
کعبه کیمی بوغازووی باری زیارت ایلیوم
بوسۀ روح پرورین حقّین ایدر ادا حسین
دوزدی کی اوچ پر اوخ سنون پوزدی بوتون نظامووی
دوزدی بو سوز صحیحیدور آلدی بو اوخ دوامووی
دوزدی بو بی مرامیلر بیلمدیلر مقامووی
سن ولی قهرمان کیمی حفظ ایله ئوز مرامووی
گون قاباقیندا تشنه لب ساخلاما ئوز امامووی
گون ایتیرر یولون اگر اولماسا رهنما حسین
معترفم شعورووه واقفم آرمانووه
مندن اولا صد آفرین غیرت بیکرانووه
باخما بو های و هویده سودووه یا زیانووه
آند اولا خسته جانیمه آند اولا تشنه جانووه
بیر گونی پادشاهیلر باش قویار آستانووه
اوندا دیرسن آی بابا عشقووه مرحبا حسین
آغلاما اوغلوم آغلاما من سنه اصغر آغلارام
فکر ایلمه ربابیدن من سنه کمتر آغلارام
هرکس الینده ایلسه غنچانی پرپر آغلارام
قبریده ایلرم سنه سینمی بستر آغلارام
یارووه غملی زینبیم باغلاسا معجر آغلارام
عمری نقدری وار سنه ساخلیا جاق عزا حسین
- چهارشنبه
- 5
- خرداد
- 1400
- ساعت
- 21:5
- نوشته شده توسط
- یوسف اکبری
- شاعر:
-
ناشناس ؟؟؟
ارسال دیدگاه