چکدیم اورکده عشقیمی معیاره یا حسین
قاره گییوب قوشولدوم عزاداره یا حسین
گوزلر گوزوم بیر ایل بویی ماه محرمی
هر گون گوزومده جلوه لنیر کربلا غمی
عشقون اورکده آختاریرام بزم ماتمی
کعبم دی هر یئره چکه لر قاره یا حسین
گوردوم چیخیب دی کوچه و بازاره دسته لر
عاشقلرون گییوبدی قرا جامه دیده تر
اسدوقجا پرچمین ائله دی روحیمه اثر
رونق وئریلدی یازدیقیم اشعاره یا حسین
باشدان هوای وصلینی بیر لحظه آتمارام
عشقونله دلخوشام بو قرا نی چیخاتمارام
سند نصورا بیر آیری کسه ال اوزاتمارام
ال دوت گیلن اوزون بو دل افکاره یا حسین
سن دین یولوندا عزتیله ائیلدین قیام
ظلمیله کسدیلر باشیوی فرقه ظلام
وئردین کسیک بوغازیله حق اهلینه پیام
قربان اولوم بو نهضت و ایثاره یا حسین
سن آللاهین حبیبی سن ای شاه بی بدیل
ائیله نظر گناه منی ائیلییب ذلیل
گوزیاشلی آستانیوه من اولموشام دخیل
وار دور امیدیم ائیلمه آواره یا حسین
ای کایناته شان و شرف عزّ و آبرو
هر بیر نفسده ائلمیشم وصلین آرزو
بیرده هاچان نصیبیم اولار قبر مشکبو
ائیله نظر بو دیده خونباره یا حسین
فصل عزادی گرمیدی بازار کربلا
ائیلور سفر تدارکی زوّار کربلا
دعوت یازیر یقین کی علمدار کربلا
تاپشیر بو بینوانی علمداره یا حسین
عباس آدی گلنده سالیر شور عالمه
سو صحبتی دوشنده اورکلر دولورغمه
گوگلوم قوشی قاناد چالیری نهر علقمه
قان آغلاسام سزادی او سرداره یا حسین
وئره م آقا سنی علی اصغره قسم
جدون شبیهی اوغلون علی اکبره قسم
اللردن ال دوتوب کسلین اللره قسم
محشر گونونده لطف ائیله حضاره یا حسین
لطف و سخاده شانوه شامل دی هل اتی
بیر عمریدور که درگهیوه اولموشام گدا
آدین گلنده روحیمی مدهوش ائدیر آقا
چوخ شایقم بو گلشن و گلزاره یا حسین
- چهارشنبه
- 5
- خرداد
- 1400
- ساعت
- 22:6
- نوشته شده توسط
- یوسف اکبری
- شاعر:
-
محمد هوشمند
ارسال دیدگاه