بیر گجه رویاده گوردوم ئولموشم
چوخ اسفلی منظره لر ،گورموشم
غسل ویردی تا که غساله منه
اشک حسرت جاری اولدی دامنه
پیکریمی آغ کفنه بوکدولر
اوستومه آهسته تپراق توکدولر
قبر ایوینده گردوخاکه باتمیشام
بیر قرانلوق یرده تنها یاتمیشام
هر گلن،سویلوردی روحی شاد اولا
تا ویروبدی فاتحه،دوشدی یولا
بیر به بیر،آیریلدیلار یولداشلاریم
قویدولار تنها منی،قارداشلاریم
هم باجیم گیتدی، دالیسیجا آنام
مندن آیریلدی او گوزیاشلی آتام
سسلدیم هیچکس،منه سس ویرمدی
عاقبت بیر کس منی ،دیندیرمدی
باخدیم اطرافه ولی یوخدور، کسیم
قورخودان دای چیخمادی اوردا سسیم
ناگهان،گوردوم گلور ایکی ملک
گوزلریمده تار اولوبدی نه فلک
بیر ملک سویلوردی که آدون ندی؟
علت افغان و فریادون ندی؟
ای سیه رو،کیمدی اللهین سنون؟
سویله کیمدی دهریده شاهین سنون؟
فانی دنیاده اولوب عمرون تباه؟
نامه ی اعمالیوی ایتدون سیاه؟
الله امر ایلوب بیله وعده ویرین
بنده ی عاصی جهنمدور یرین
دای الیم الدن ئوزولدی سولموشام
ناامید و خار و مایوس اولموشام
اللهین ماموری امر ایتدی منه
دوش یولا،بیر بیله باتما شیونه.
راهی اولدوم نار دوزخده یانام
ایتدیگیم اعماله خاطر اودلانام
صاق صولومدا اللهین ماموری وار
ناگهان،ظلمتده گوردوم نوری وار
بیر آقا گویا گلور دیداریمه
باخدی آهسته منیم رخساریمه
لبلری ذکر حق یکتا دییور
الده قرآن،دلده یا زهرا دییور
باشیمون اوسته دوشوبدی سایه سی
وار باشیندا بیر یاشیل عمامه سی
گوزلری شهلا،یوزی نورانیدی
قامتی رعنا،ملک دربانیدی
باخدی ماموران حق بو صحنه یه
قویدولار اکرامیلن،ال سینه یه
ایلییوللر حیرتیلن زمزمه
دادیوه گلدی حسین فاطمه
غصه و غمدن ئورگیم دینجلوب
صاحب روز قیامتدی گلوب
بیر نگاهیله منی شاد ایلدی
غصه و غملردن آزاد ایلدی
سویلدی اول مه جبین خنده رو:
ای ملکلر؛هیچ تانیرسیز کیمدی بو؟
بو همان کسدی حسینیم وای دییوب
روضه لرده اصغره لای لای دییوب
بو منیم یاسیمده سینه داغلییوب
اکبر و عباسیمه چوخ آغلییوب
هر محرمده سالوب شال عزا
تا ئولونجه سسلیوب،آی کربلا
من حسینم مصطفی دلبندییم
حضرت صدیقه نون فرزندییم
قویمارام ئوز نوکریم بی یار اولا
روز محشر نا امید و خار اولا
گوردوم اربابیم حسینون لطفونی
لحظه ی پرالتهاب و غم گونی
باشیمی سالدیم اشاقه آغلادیم
ذکر یا زهرا دییوب دل داغلادیم
تا دیلیمه گلدی زهرانین آدی
نوکرین،مولا بهشته یوللادی
ظلمت شبده حسین مهتابیدی
فاطمه اوغلی بیزه اربابیدی
- پنج شنبه
- 6
- خرداد
- 1400
- ساعت
- 13:20
- نوشته شده توسط
- یوسف اکبری
- شاعر:
-
سیف الله آذری
ارسال دیدگاه