ای دل ندور بهانه بئله بی قرارسن
دنیادن اوتری بیر بئله بی اختیارسن
بیجا یره ئوزون وروسان آب و آتشه
دائم اسیر دامن گرد و غبارسن
بیر گون گلوب سنیده قوجاقه آلار اجل
سنده گدنلرون کیمی بی اعتبارسن
دنیا وفا نه شاهه ایدوب نه گدالره
باقی فقط خدادی عبس انتظارسن
اوچ گونن اوتری باغلا ما بئل دار فانیه
دنیا طناب داریدی محکوم دارسن
بیر گون سنی مزاره قویار اقربالرون
ناز ایلمه که صاحب ایل و تبارسن
اوچ گون سنه عزا دوتاجاخ ایستینلرون
دوردومجی گون غریبه شهر و دیارسن
ایل و تبار و شهرت و ثروت بهانه دور
اعمال خیرون اولسا یقین رستگارسن
قورخوم بودور که خیر عملون کم گله اوگون
اعمالون اولماسا هدف مور و مارسن
- جمعه
- 7
- خرداد
- 1400
- ساعت
- 15:51
- نوشته شده توسط
- یوسف اکبری
- شاعر:
-
مرتضی اسکندری
ارسال دیدگاه