شفق شفق یاییلوب قلب آسماندا حسین
ورق ورق یازیلوب سینۀ زاماندا حسین
مدار عشقین اگر لحظه لحظه جان دولانور
سالیبدی بندینه چون جانلاری جهاندا حسین
حسین حسین دئمگین والله آیری عالمی وار
صفا وئروب دیلیمه ظاهر و نهاندا حسین
حسین حسین دئمه سم کافرم ئوزوم بیلورم
شرف دادین تانیدوب قطره قطره قاندا حسین
حسینه واله اولوب آسمان سلم و رضا
مدیر مکتب اولوب علم لا مکاندا حسین
بشر دینمیورم واقفم مَلَکده دگیل
نهانی رازی بیان ائلیوب عیاندا حسین
حسین آدیلا مرید اولموشام ولایتینه
دوز عاشقی بیلورم ساخلییار آماندا حسین
حسین چی اولماقیچون امتحان گرک وئره سن
وئروبدی درس بقا خلقه امتحاندا حسین
حسینی گور صورا گئت کربلانی معنی ایله
ائدیبدی معنی اونی، اون ایکی بیاندا حسین
حسین آدین گوله دئ، گول گولر سنون یوزووه
دییر بیر آیری گل اولدی ئوزی جهاندا حسین
حسین آدین سوآ دئ، گور نه شوقیلن دانیشار
دییر زلال شرف حظّ آلوب یاناندا حسین
حسین آدین یئله دئ، یل یئرین قرارین آلار
بو مژده نی هامییا پایلاشار بیر آندا حسین
حسینی بیرده آپار مکّۀ معظّمییه
طوافه کعبه دورار فیض آلان مکاندا حسین
اگر سینونده مدال ایله سون حسینین آدین؟
قالارقی آددی قالار زنده هر زاماندا حسین
حسینون آدی مگر قلبیدن چیخار پوزولار؟!
شفق گلنده گینه عرشیده حسین یازیلار
- جمعه
- 7
- خرداد
- 1400
- ساعت
- 15:58
- نوشته شده توسط
- یوسف اکبری
- شاعر:
-
قابل منصوری نژاد
ارسال دیدگاه