ای قلم باشلا ابوالفضلون آدیلان سخنی
آدینه قربان اولوم مست ائلیوب آدی منی
دست خالی یولا سالماز قاپوسیندان گلنی
کیم توسل ائلسه صدقیله عباس آدینا
آند اولا حضرت زهرایه گلر امدادینا
قالسون هروقتیده مشکلده دنن یاعباس
گلمیشم درگهووه صدقیله من یاعباس
دوشموشم مشکله امدادائله سن یاعباس
آندا ویروم سنی عرش اوسته ویریلمش علمه
حاجتیم واردی قاپوندان منی گل رد ائلمه
دردوی سعی ائله اغیاره دئمه یاره دنن
گل فقط مشکلووی محرم اسراره دنن
آقااوغلی آقادی قولسوزعلمداره دنن
صدقیلن کیم گله درگاهینه حسّاسیدی بو
ناامیدایلمیوب بیرکسی عباسیدی بو
درگهیندن آقامون مطلب آلوب ارمنی لر
دایماً لطفینه حیرتده قالوب ارمنی لر
آدینا روضه قویوب سفره سالوب ارمنی لر
فخریدور بیزلره بیگانه گلوب مطلب آلور
والله عاشقلرینون دهریده باشی اوجالور
نجه عباس آدینون دهریده چوخ حرمتی وار
خالی ازلطف اولابیلمز بوآدین حکمتی وار
سسلننده بیلینور کی نه قَدَرلذّلتی وار
الله الله نه گوزل نامیدی عباسین آدی
طفل لر قلبینه الهامیدی عباسین آدی
مجلس ماتمینه نوحه دیینلر قربان
قاره پرچملرینه قاره گیینلر قربان
قبرینه عشقیله احسان الیینلر قربان
نه قَدَر ایله سون احسان قاپوسیندا کمدی
آدینون عاشقی تک بیز یوخ هامی عالمدی
عشق وایثارینی ثابت ائلیوب غیرتده
عموسی جعفرطیاری قویوب حیرتده
بنذیور حیدر کراره یقین صولتده
مرحبین مرکبینی پیلینون اوغلیدی بو
قلعهٔ خیبری فتح ایلینون اوغلیدی بو
ائتدی تسلیم عموسی دینینه بیرجوت قولونی
اورگئدوب قارداشینون اوغلونا عشقین یولونی
کسدیلردشت بلاده اوجا سروین خولونی
گور اوسرداره نجه چاره یولون باغلادیلار
مشکینی اوخلادیلار سینه سینی داغلادیلار
دوره سینده اوزمان قان توکن اعداچوخودی
طاقتین الدن آلان گوزده کی اوچ پر اوخودی
نه قدر سعی ائلدی چیخماقا امکان یوخودی
دیزلرین مرکبین اوستونده گتوردی قاباقا
چوخ مشقّت له بیرآزباشینی سالدی اشاقا
ایستدی مرکبین اوسته چیخادا اوچ پر اوخی
چوخ تلاش ایلدی افسوس گوروب چاره یوخی
من اشاره ائلیوم سن سوزی اوّلدن اوخی
اگدی باشین اشاقا دوشدی کلاه جنگی
باش آچیلجاق گنه جنگین ویرولوب آهنگی
روبرودن یتشوب نوفل دون الده عمود
قالخزوب آهن عمودی گوگه یارب ودود
اندیروب باشینه لنگر ائلدی کُل وجود
گئتدی جنتدن اودم حضرت زهرانی یره
زیندن سالدی یوزی اوسته اوسقّانی یره
اوجا قامت اوجا یئردن یخیلان وقته اگر
اولماسا تکیه گهی نیلیر اُ‌ول لحظه مگر
لنگر ایلر بدنی تپراقا یوز اوسته دگر
آچما سعی ایله سوزی قوی ائله بوحالدا قالا
یوزی اوسته یخیلاندا اوقالوب گورنه حالا
سنه"تیموری"اگرویرسه صله بنت رسول
یازدیقون مطلب اولار محضرمولاده قبول
گتورر اللری محشر گونی زهرای بتول
وار امیدیم سنه اللّه بیر عنایت ائده جک
آناسی فاطمه محشرده شفاعت ائده جک
- جمعه
- 7
- خرداد
- 1400
- ساعت
- 16:9
- نوشته شده توسط
- یوسف اکبری
- شاعر:
-
ناشناس ؟؟؟
ارسال دیدگاه