گوگلوم فشار غمدن ويرانه دی عم اوغلي
وصل عالمی مبدل هجرانه دی عم اوغلي
عشقون سالوب بلايه بو مبتلای عشقی
نورون ائدوب منوّر خلوتسراي عشقی
تاپشير خدای عشقه بو آشنای عشقی
دیباچهٔ حياتيم پايانه دی عم اوغلي
اون سگّيز ایل جهاندا عمر ايلديم قوجالديم
دوقّوز ئيلي بو ائوده سندن افاضه آلديم
بير غنچه يم تئز آچديم گلشنده تئز سارالديم
شمع وفايه زهرا پروانه دی عم اوغلي
افسوس بو جهاندان باشی قرالي گئتديم
شاد اولماديم گلندن ياسلي عزالي گئتديم
سيلي يري يوزومده سينه يارالي گئتديم
غم غصه رؤيتيمدن رایانه دی عم اوغلي
ترک ايلورم حسن تک ايستکلي نور عینی
چوخ آرزو ائدريم داماد ائدم حسینی
تازه گلین ائديديم بو زینب حزيني
کلثومه من سیز عالم بيگانه دی عم اوغلي
ممنونووم جنازه م دفن اولسا آی باتاندا
ظلمت دوتوب جهانی گوزلر بوتون ياتاندا
تاپشير بتولي قبره غم گويلره چاتاندا
گر چه بو قيز رسوله ریحانه دی عم اوغلي
حلّیت ايستورم من چوخ ويرميشم اذیت
باخسون او گل جماله زهرا چکور خجالت
مندن صورا عم اوغلي قال سالها سلامت
دردون غمون ملالون قرآنه ،دی عم اوغلي
ناله ائدر "کريمي" نی تک گلر نوايه
گه یوز دوتار بقيعه گه دشت کربلا يه
سینه ووروب سيزيلدار آغلار بو ماجرايه
قوی هر گورن دئسون بو دیوانه دی عم اوغلي
- یکشنبه
- 9
- خرداد
- 1400
- ساعت
- 16:58
- نوشته شده توسط
- یوسف اکبری
ارسال دیدگاه