علی زلفون تلينه دانه کيمي قان دوزولوب
ديه سن رشته ابريشمه مرجان دوزولوب
دئماقا جان سنه قربان اولا خجلت چکورم
گورورم هر تليوه نوبته بير جان دوزولوب
قان دولان گوزلرون آچ باخ بو تماشاچيلره
باملردن نقدر حسنوه حیران دوزولوب
اهل قرآن خود قرآنی قويوب مسخريه
وورماقا طعنه مسلمانه مسلمان دوزولوب
گوزلروندن ايراق اولسون داش اتورلار آناوا
گولماقا گوز ياشيما فرقهٔ نسوان دوزولوب
سن هارا شام هارا من هارا بیگانه هارا
نه عجب عشق يولون گئتماقا امکان دوزولوب
نیزه دن بير جه دولاندير گوزووي باخ يوزومه
نرگس مستوه حايل صف مژگان دوزولوب
کعبهٔ شوق وصالون منه مشکل ياراديب
هر قدمده يولوما خار مغیلان دوزولوب
نیزه ده چاتمور الیم شانه وورام تللريوه
توز دوتوب قان بورويوب نظمی پریشان دوزولوب
من "کریمی" گر ئولم عشق علی اکبر يله
قبريمه سنبل و گل لاله و ریحان دوزولوب
- یکشنبه
- 9
- خرداد
- 1400
- ساعت
- 17:12
- نوشته شده توسط
- یوسف اکبری
ارسال دیدگاه