آچ گوزون گوزلره قربانم اوغول
آناوام حالی پريشانم اوغول
بيرده سسلن آناجان
من ديوم جان بالا جان
شانه وورميشديم علی تللريوه
قان خضاب ايلمسين اللريوه
گوز توخوندي قارا کاکل لريوه
باخ منه گور نجه گریانم اوغول
بيرده سسلن آناجان
من ديوم جان بالا جان
قربانام گوزلريون قاره سینه
کوره گونده بو قلج یاره سینه
چاره قیل بو وطن آواره سینه
بيکسم خسته و نالانم اوغول
بيرده سسلن آناجان
من ديوم جان بالا جان
قويدي دشمن منی حسرت طويووا
ياسه باتديم آنا قربان بويووا
لبلروندن هاني سو قاني يووا
منده اوچ گوندي لب عطشانم اوغول
بيرده سسلن آناجان
من ديوم جان بالا جان
بويووا گوز دولوسي باخماميشام
طوي حناسي اليوه ياخماميشام
سنه داماد اوزوگي تاخماميشام
آتش حسرته سوزانم اوغول
بيرده سسلن آناجان
من ديوم جان بالا جان
آچ گوزون اشگيمي گُلگون ائلمه
محنتونده منی دلخون ائلمه
گوزه ليم ليليني مجنون ائلمه
من که مجنون بيابانم اوغول
بيرده سسلن آنا جان
من ديوم جان بالا جان
دل آچاندان دليوه جان دئميشم
دليوه آيهٔ قرآن دئميشم
سنی قرآنيمه قربان دئميشم
دليوه جانوه قربانم اوغول
بيرده سسلن آنا جان
من ديوم جان بالا جان
سوورم باشوه دائم دولانام
سایه وه شام و سحر دالدالانام
اولما راضی غم هجراندا يانام
بحت برگشتهٔ دورانم اوغول
بيرده سسلن آنا جان
من ديوم جان بالا جان
اي کریمی نه دی بو طول امل
عمل ائت حیّ علی خیرالعمل
ناگهانی يتيشر پيک اجل
آچ گوزون گوزلره قربانم اوغول
بيرده سسلن آنا جان
من ديوم جان بالا جان
- یکشنبه
- 9
- خرداد
- 1400
- ساعت
- 17:59
- نوشته شده توسط
- یوسف اکبری
ارسال دیدگاه