گئنه يالقوز امامون یاسی گلدي
حسينون یوم عاشورا سی گلدي
آچيلدي تکیه لرده قاره پرچم
قورولدي هر طرفده بزم ماتم
طلوع ائتميش مگر ماه محرم
دمادم موجه غم درياسي گلدي
حسینی لر گيوب ماتم لباسی
عروسين قانه دوندی طوي حناسي
جوانلار گئديلر اکبر قراسي
قولاقه لیلی واويلاسي گلدي
بو آیدا سو بهاسين قان يازوبلار
کتاب ظلمه چوخ عنوان يازوبلار
امامون قتلنه فرمان يازوبلار
حسينون قتلنون فتواسي گلدي
بو آیدا اوخلانوب شش ماهه اصغر
بو آیدا دوغرانوب شهزاده اکبر
ملک لر سسلدي الله اکبر
اوديکه ياننه ليلاسي گلدي
بو آیدا يخديلار عباسی آتدان
وئروب بير جوت قولون بير مشگه قربان
ديردي یول وئرون ای قوم عدوان
حسينون تشنه لب سقاسي گلدي
قويوبلار قاسمه بير طوي بناسين
سريه ايسلادوب قاندان حناسين
بيچوب خنجر تيکوب اوخ طوي لباسين
عروسين محنت عظماسي گلدي
حسین جان اوسته دی آلقان ايچينده
وجودی گيزلنوب پیکان ايچينده
گورنده زینبی عدوان ايچينده
حزين صوتيله وا اُختاسي گلدي
نجفدن باش آچوخ ساقی کوثر
بهشت عدندن جدی پیمبر
بقيعدن مجتبی زار و مکدر
الينده ساچلاري زهراسي گلدي
قوشوندان آيريلوب شمر ستمگر
نه ظلم ائتدي آچوب باشین پیمبر
جدادن سس گلوب الله اکبر
بنات حيدرين غوغاسي گلدي
اسوبدي قاره يللر گون دوتولدي
حسین قتله يتشدي ایش قوتولدي
ئولوبدور باغبان گلشن پوزولدي
اسارت طرحنون طغراسي گلدي
"کريمي" مسئلت ايلر خدادن
اميدين کسمه سین آل عبادن
گئدنده قبره بو دار فنادن
گوره بالينينه مولاسي گلدي
- یکشنبه
- 9
- خرداد
- 1400
- ساعت
- 21:0
- نوشته شده توسط
- یوسف اکبری
ارسال دیدگاه