چکوب قضا اَلی قاندان اوغول نقاب اوزیوه
اذیّت ایلمه سین بلکه آفتاب اوزیوه
نئدیم نه چاره، ایلیمدن اوغول الیم اوزولوب
بو قان نه قاندی باشوندان عذاریوه سوزولوب
و یا که سبحه مرجاندی رشته تک دوزولوب
اولوبدی یا یم حسنونده چون حباب اوزیوه
اجازه ویر یارالی باشوه دوروب دولانیم
کیمیم واریمدی داخی سایه سینده دالدالانوم
یوخومدی آرخام ایلیم بس کیمه من آرخالانوم
گوزوم توکر او سببدن سرشک ناب اوزیوه
سنیله همدم اولوب یاتمادیم گیچن گجه من
گیدوبسن اللهیم عالمدی دوزموشم نجه من
هامی گلوب سنی گورماقه قالموشام گجه من
توکوب سرشکین ازل آل بوتراب اوزیوه
اوزومی سن گیده لی مونس غم ایلمیشم
محبت عالمینی آیری عالم ایلمیشم
سرشکمیله یوزون قانینی نم ایلمیشم
سیلیم بو زلفومیله اولماسین عذاب اوزیوه
تعجبم نیه من اُلمورم علی قالّام
سنون غمونده اوغول باشیمه قرا سالّام
غم ایلمه باشوی سینم اوستونه آلّام
چتندی لیلیه اولسا مکان تراب اوزیوه
اولوبدی گور نجه سندن صورا سوزوم بالا وای
سنه فدا اولا ایکاش ایکی گوزوم بالا وای
چتندی بیرده یوزوندن دونه یوزوم بالا وای
که اورگشوبدی یوزوم نیلوم ای شباب اوزیوه
دگوب یارا باشیوا مرتضایه بنزرسن
نماز صبحده محراب ایچنده حیدرسن
یارالی شیر خداسن و یا پیمبرسن
آپاراجاقدی اوغول باخسا کیم صواب اوزیوه
خراب اولیدی گوروم تئز بو عالم فانی
آنان یووا یوزیون قانینی یوخ امکانی
سووا یوخومدی گمانیم داخی اوغول جانی
ولی رقیّه سَپَر اشکدن گلاب اوزیوه
علاوه نازلی رقیه یانان دلی داغلار
آچوبدی معجرینی یاره لی باشون باغلار
من آغلارام بالالار آغلار عمّه لر آغلار
قوجاقدا قارداشون اصغر باخار رباب اوزیوه
دیمه آنام نیه رخت حیاتینی سویمور
عجبدی تیر جفا قلبیمه دگوب اویمور
گوزوم باخا سنه مایلدی، گوز یاشیم قویمور
باخا دویونجا اولا بلکه کامیاب اوزیوه
عجب مرامه یتشدون بئله مرام اولماز
جهاندا سن گیده سن من علی قالام اولماز
جمالیون سوزی دنیا بویی تمام اولماز
اگر یازا (حسنی) گونده بیر کتاب اوزیوه
- دوشنبه
- 10
- خرداد
- 1400
- ساعت
- 15:9
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه