ای اولان سردار سربازان عزّت یاحسین
قانوزیله تازه جان تاپدی شریعت یاحسین
بعضی سربازون مسیحی زاده و اهل ادب
مسلم اولماقه مسیحی، رأفتوز اولدی سبب
ئوز یرینده معجزه آثارینی گورجک وهب
آتدی زُنّاری دوتوب فکر سلامت یاحسین
بعضی سربازون زهیرِ قینِ عثمانی مرام
ظهریدی صرف طعامه ایلیوب برپا خیام
بیله موقعده اونا سیزدن یتیشدی تا پیام
بو پیام ایتدی اونی حقّه هدایت یاحسین
بعضی سربازون جوان دل پیر، ابنِ عوسجه
قویمادی عشقین قطاری لنگ اولوب قالسون گئجه
کوفه دن عشق حقیقتله نجه چخدی گئجه
تا بولوندورسون ندور معنا و صورت یاحسین
بعضی سربازون که حرّ آدلاندوربدی مادری
گفتگوی نفس و عقله عشق ایدوبدی داوری
حکم عشقه عاشق بی تابین اولدی باوری
نفس و عقله عشق ویردی روح وحدت یاحسین
زور بازوسی اولان مین پهلوانیله قیاس
بیر قَدَر فکریله دوشدی قلبینه خوف و هراس
توبیه اولدی موفّق حقّه ایلردی سپاس
لطف حقّ اولدی سبب تاپدی سعادت یاحسین
بعضی سربازون که نافع آدلی تیراندازیدی
صاحب ایمانیدی بو فنّده ممتازیدی
دین یولوندا باش و جانیندن گچن سربازیدی
جدّ و جهدیله ایدوب سیزدن حمایت یاحسین
بعضی سربازون غلام ترک اوزی اهل یقین
دیلمیدور آدی اسلم سوزلری شورآفرین
مرحبا بیله غلام جان نثاره آفرین
روز عاشوراده گوستردی حمیّت یاحسین
مهر آل اللّهیله قلب ملولین شاد ایدوب
مرکز میداندا اوچ دلده رجز ایراد ایدوب
ترکی و فارسی عرب لفظیله حقّی یاد ایدوب
چولقادی اشراری یکسر بهت و حیرت یاحسین
قالدی حیرتده بو گفتاره هامی قوم شریر
بعد سسلندی امیریمدور حسین نعم الامیر
بو بلاغت بو متانت بو کلام دلپذیر
بیر نفر غیر عربده بو فصاحت یاحسین
فرد فرد افرادیوه اولدی او گون عزّت نصیب
اولمیوبلار زحمت شمشیر و اوخدان ناشکیب
بی کلاه و بی زره جنگ ایلیوب پورِ شبیب
روبرو اولسون اونا ایتموبله جرأت یاحسین
عدّه ای سرباز جانبازون تمامی شیرگیر
تک تکی آزاد مرد و دانش دینه بصیر
ایتدیلر سیزدن حمایت جانیله مثل بریر
بو حمایتدن تاپوبلا چوخ شرافت یاحسین
بعضی سربازون نمازی یاد ایدوب حقّه مرید
بوثمامیدی، بو قولیله اولوبدور روسفید
سیز نمازیله اونا ویردوز نهایتده نوید
بو نویدیله تاپوب بیر آیری شهرت یاحسین
بعضی سربازون که کوته قدّیدی آدی سعید
اوخ قلج نیزه قباقنده اولوب سدّ سَدید
بیر سعیدیکه نماز خوفده اولدی شهید
محضروندن درک ایدوب بیر آیری عزّت یاحسین
کلّ سربازون رکابوندان تاپوب خیر کثیر
قویدولار قاندان باشا تاج شرافت بیر به بیر
بعضی سربازون که حین جنگده اولدی اسیر
اولدی آخرده شهادت بو اسارت یاحسین
کاش من قربان اولیدیم آخرین قربانیوه
آخرین ساعتده گلدی قاتدی قانین قانیوه
آخرین امضانی عبدالله قویوب پیمانیوه
سینن اوسته نوش ایدوب شهد شهادت یاحسین
بعضی سربازان شاخصدن که ذهنی یاد ایدوب
دلنشین طرزیله الحق شعرینی انشاد ایدوب
زاد صادق بعضینه امّا منی ارشاد ایدوب
تا که مندنده اولا عرض ارادت یاحسین
من #حسینم_یایِ نسبتله #حسن مشهوریم
زادگاهیمده غریبم آشنا مهجوریم
گرچه مهجورم ولکن لطفوزون مسروریم
گورموشم سیزدن بلی دائم کرامت یاحسین
اصل بانی اولدی اوّل مهدی خسروشهی
روح ذهنی ایلدی بو سوزده منله همرهی
سعی و کوشش ایلدیم اولدی بو شعره منتهی
ناقص اولدی ناقص ایتدی هر نه دقّت یاحسین
- دوشنبه
- 10
- خرداد
- 1400
- ساعت
- 15:16
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه