گل جان ویرورم حالیمه باخ آغلا سکینه
آچ معجریوی، گوزلریمی باغلا سکینه
ای قارداشیمون نازلی بالاسی سنه قربان
دوندر یوزومی قبله ی جانانه ویروم جان
گرچه باخارام یولّارا چوخ چوخدی ملالیم
زلفیم کیمی پوزقوندی پریشاندی خیالیم
دنیا بویی نسگل اولی اهل دله حالیم
آغلالّا، منی یاده سالوب شیون ایده لّه
قبریمدن اوتور مصره گهی شامه گیده لّه
بیجا دیمه اشکیم آخوری عارض زرده
اُلسم من اگر چکمه بو درد و غمه پرده
قارداشیم حسین هجری گتوردی منی درده
سسلردیم اونی داده گله، گلمدی امّا
بی مهر دگولدی منه، وار علّتی گویا
عمّن ایلوری ایمدی سنه نچّه وصیّت
ترک ایلسه دنیانی بو گون ایلسه رحلت
گر یثربه گیتسن وطن اولسا سنه قسمت
سویله آنامین قبرینه ای باشی بلالی
زینب قیزون اُلدی اورگی غملی یارالی
جسمیم یارالی، قلبی شکسته اُلورم من
گل گوزلریمی باغلا قیزیم ایلمه شیون
قوی من اُلوم، اوندانصورا شیون ایلسن سن
گوزدن یوزیوه اشک تر حسرتی باغلا
باغلا گوزومی، صوندا یانان سینوی داغلا
گل سینمی حسرت اوخی چوخ دلدی سکینه
غم یورقونی عمّن داخی دینجلدی سکینه
قرآن اوخیون پیک اجل گلدی سکینه
قرآن اوخیان اکبر و عبّاسیم اُلوبدی
هم عون و هم جعفریله قاسم اُلوبدی
بیرده بو وصیّتدی اگر اولماسا زحمت
زحمتده قیزیم اولسا اگر قوی منه منّت
بو پیرهنی قبریمه قوی گر اولا فرصت
تا قبریده زهرایه ایدوم ردّ امانت
بو کوینک اولار امّته اسباب شفاعت
بو کوینک او کوینکدی که شاهنشه بطحا
گیموشدی بونی اگنینه تا سویمیه اعدا
بو کوینک او کوینکدی که ایتموشدوله یغما
غارتدن آلوب ساخلاموشام مایه ی شیون
قارداشیم حسینندی بونی چوخ سویرم من
دلدن دوشوب ازبسکه دیوب دل او وفالی
یاندی دلی اولدوقجا بی بی حالینه حالی
نسگل شرریندن اورگی اولدی یارالی
چوخ حسرتیله گوردی گوزی صاق صولی گوزلر
گویا گوزی یولدا گلنی وار یولی گوزلر
سویلوب نیه حسرت باخوسان صاق صولا عمّه
آز قالدی گوگل کاسه سی قاندان دولا عمّه
سن تک باخورام منده چوخ حسرت یولا عمّه
فکر ایلیورم قوم و قلبیلم گله ای کاش
گاهی دیورم هاردا قالوبسان علی قارداش
گل گور نجه عمّن قالوب آواره وطندن
ناخوشدی عیادت نظری وار علی سندن
که سسلر آتامی گهی ایستر سنی مندن
عمّم اُلوری لطفیوی شامل ایله قارداش
گل آغلیاق احوالینه قارداش باجی قانیاش
بو شام یرین عمّه گوروم بیر باغ اولیدی
دورینده حصاری بو باغین بیر داغ اولیدی
ایکاش ابوالفضل عموم ایمدی صاق اولیدی
سن حسرتیله ترک جهان ایلمییدون
یولّاره باخوب باغریمی قان ایلمییدون
مرسومیدی اود یانسا اود اوسته قازان آغلار
غربتده غریب اُلسه مزارین قازان آغلار
غم دفترینه درد و ملالین یازان آغلار
یاز سنده بو نسگللری قبریم داشی اوسته
بولسونله اُلوبدی بو باجی قارداشی اوسته
بیر قدر سکینیله دانیشدی او بلاکش
دوندی قاپویه باخدی اولوب حالی مشوّش
بیر آه چکوب سالدی دل عالمه آتش
سولدوردی او آهی گل زهرانی ساراتدی
یعنی چمن و گلشن طاهانی ساراتدی
سسلندی گل ای حجّت حق شاه ولایت
گل یاخشی گلوبسن قیزون ایلور بابا رحلت
چوخ شکر اولا اللهه منه اولدی سعادت
گلدون دیمه که ایلمدی زینبون اعزاز
یوخ تاب و توانی سورونوب ایلیه پیشواز
قربان او گلن یولّاران ای حجّت رحمان
ای ناطق قرآن اوخی قرآن ویرورم جان
تاپشور ملکُ الموته آلا جانیمی آسان
سویله بدنی خسته دی ایذا و جفادن
جسمینده نشان وار ستم کرب و بلادن
زهرا بالاسیندان (حسنی) بیر صله ایسته
هر شام و سحر بو صله نی گل دله ایسته
نه تک بو ایله بلکه تماماً ایله ایسته
یعنی اولاسان کرب و بلا دشتینه زوّار
بو جمعیله هر ایل اولاسان اوردا عزادار
- دوشنبه
- 10
- خرداد
- 1400
- ساعت
- 16:29
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه