ای اولان قانه غلطان حسینیم
ای تنور ایچره مهمان حسینیم
توش ایدوبدی قضا یاری یاره
چکدی عشقون منی بو دیاره
حیف اولا واردی سینمده یاره
بو یارادن گلر قان حسینیم
بسلمیشدیم باشون من دل اوسته
خاره یالوارمشام بو گل اوسته
باشوی کیم قویوبدی کول اوسته
جسم زهراده ای جان حسینیم
ای اولان عالمه نور دیده
آچ گوزون گلمیشم بازدیده
لعنت حق گلیدی یزیده
قویدی زهرانی گریان حسینیم
گرچه سولموش سوسوزدان دوداقون
گل دیله بیر دانیش وار قوناقون
چوخ چکللر بالا اشتیاقون
ایتگیلن بیر سوز عنوان حسینیم
ای سپهر ادب آفتابی
ای اولان ابر تک کول حجابی
سسلیرم من سنی یوخ جوابی
اولموشام گور نه گریان حسینیم
هیچ کسون دردی زهرایه چانماز
گوز نجه خون دل اشکه قاتماز
یاتمسان یاخشی زهرا اویاتماز
زلفون ایلر پریشان حسینیم
گور آناوا غمون نیسگل اولماز
هجرون آیا منه مشکل اولماز
مرهمی هیچ یارانون کول اولماز
کیم گوروب بیله درمان حسینیم
سالدی عشقون منی چوخ بلایه
چکدی گتدی اوغول کربلایه
آهم اوج ایلوری نه سمایه
نعشوی گوردوم عریان حسینیم
ویر جواب ای اوغول باغریقانم
بیر دانیشدور سنه میهمانم
زینبوندن ولی ناگرانم
تک قالوب سینه سوزان حسینیم
ایمدی غمله همآغوش اولوبدی
قمچی لردن سیه پوش اولوبدی
آیری بیر محنته توش اولوبدی
ویردی اولموشدی هر آن حسینیم
هر بالا قیز نوایه گلنده
چوخ یانار راز قلبین بولنده
غملنر اشک چشمین سیلنده
نی کیمی ایلر افغان حسینیم
بو حسنی یوزه اشکی باغلار
ماتمونده یانار سینه داغلار
مطلعین هر گورن سویلر آغلار
ای اولان قانه غلطان حسینیم
- دوشنبه
- 10
- خرداد
- 1400
- ساعت
- 16:34
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه