او گونکه عرصه نی آل عبایه ائتدیله تنگ
یاغاردی قطره باران کیمی او چولده خدنگ
او گیرداریده بیر شیر دل آدی عباس
گئدوبدی عرصه میدانه اولدی پیشاهنگ
دایاندی عرصه میداندا مستشار حسین
الینده پرچم اسلام او شیر عرصه جنگ
ازل نصیحته دل آچدی موعظه ائله دی
اوزون تانوددورا بو نوع باشلادی آهنگ
حسین فاطمه نون خانه زاد نوکریم
او شاهدن ائله دیم اخذ دانش و فرهنگ
خیامه سو آپارام امر ائدوب امام مبین
مطاعیدور منه فرمان صاحب اورنگ
سو ائسته دی بالاجا قیزلارا او نام آور
جواب لا ائشیدوب، شهد سو اولیدی شرنگ
اوزی کیمی علمین محکم ائتدی اوّلده
ال آتدی قبضه شمشیره ائتمیوبدی درنگ
دئدی امامیمون امری گر اولماسیدی بو گون
سیلردی تیغ ابوالفضلدن عدو قانی زنگ
ائدوبدی حمله قاچاردی او قوم بدفرجام
نه دسته قالدی نه لشگر نه تیپ قالدی نه هنگ
نظامیدن سالوب اول قوم بی نظامی تمام
اوزون فراته یتوردی او بحرِ عشقه نهنگ
ازلده مشگینی دولدوردی چگنینه سالدی
خیال ائدوب سودان ایچسون ولی اولوب دلتنگ
ملامت ائیله دی نفسین جهاد اکبره باخ
آقام سوسوزدی دئدی ایچمه سو اولور سنه ننگ
چخوبدی نهردن ائتدی سو مشکینی محکم
وروبدی یولدا گریبانینه قضا اَلی چنگ
آجقلی شیر کیمی دوردی پور شیر خدا
یاغاردی اوستونه باران کیمی ولیک خدنگ
طواف ائدردی سو مشکین بسان کعبهء حق
او گیر داریده بیر ظالم ایلدی نیرنگ
ائدوبدی صاق قولونی ظلمیله قلم او زمان
صول اللّی باشلادی دین اوسته ائیله سین تا جنگ
دوشوب صول الده دیشینده دوتوبدی شمشیری
گوروب خیامیله یوخدور آراده چوخ فرسنگ
او حالده گینه مشکی محافظت ائیلوب
دیردی ائتمیون ای قوم عرصه نی منه تنگ
ورون یوزومه نه قدری واروزدی پیکانوز
خیامه گئتماقا بو فعلوز ائیله مز منی لنگ
وروبدی مشکینه بیر اوخ او حالیده دشمن
چالیندی قلب ابوالفضله یأسدن بیر زنگ
قلج وُران اوخ آتان اختیاردن سالدی
خصوص او کس که اونا داش آتاردی الده سپنگ
نجه یخلدی آت اوستن اَیا امام زمان
یوخیدی اَل نه ائدوب بس او با وفا سرهنگ
دوشنده سسله دی قارداش اماندی گل داده
آلوبلا دوره می دشمن منه آتولاّر سنگ
نه ظلم ائدوبدی مسلمانه گور مسلمانلار
که ائیله مزدی همان ظلمی اهل روم و فرنگ
گلوبدی قارداشی بالیننه امام زمان
گوروب بدن گل آچوب اوخلاریله رنگارنگ
مرکّب اشکین ائدوب کپرگین قلم (حسنی)
اودور که یازدوقی سوزلر اولوب ملیح و قشنگ
- دوشنبه
- 10
- خرداد
- 1400
- ساعت
- 16:39
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه